HR失業做咩好？

做HR平時見人見得多，睇人都睇得準啲，絕對可以考慮去廟街擺檔幫人睇下相。啲人嚟問運程問事業就開正你嗰範，即刻同佢做返個interview先。「先生，唔該你介紹自己吖。」同佢傾幾句就知佢點解搵唔到工，仲可以加多100蚊提供CV修改服務。

2.私家偵探

FBI教你讀心術，HR都一樣可以。成日做interview嘅HR，一個小小嘅舉動都可以睇得出candidate嘅誠意。再加上平時成日要用盡方法撬開唔講嘢嘅candidate把口，訓練得一身高超盤問技巧，審犯、捉姦無難到。

3.專業維園呀伯

HR為咗要平衡公司同同事之間嘅利益，有時要同candidate價傾下人工，有時要同老細傾下budget，有時又要同啲商舖講價為同事謀福利。牙尖嘴利去到專業級，城市論壇點可以冇咗你？

4.搬運工人

搬運厚厚嘅personal file，女同事人仔細細都有強健嘅臂彎。如果office裡面冇男同事，仲要每日幫手換水。如果係男仔更加唔駛講，搬乜都係你㗎喇。所以做搬運工人一定冇問題，送水就最啱，強勁啲嘅紮鐵都仲得。





5.QC

HR出得嚟行嘅，十個有九個都有完美主義病徵，幾細微嘅地方都唔會逃得過佢地法眼。憑住佢地完全變態級細心，件product黏咗粒塵都會見到，轉行做QC一定冇得輸。

6.扮鬼

唔少HR見人嘅時候都會被認為黑口黑面，嚇死candidate冇命賠。佢地個樣咁得人驚，最啱Halloween去主題樂園扮鬼。佢地淨係企喺度都嚇死人，化妝錢都可以慳返。

7.實Q

經過做HR長年累月嘅訓練，鍛練出「化咗灰都認得佢」嘅認人能力。做大廈實Q最重要嘅工作之一就係幫住客開門，佢地包保認得曬啲住客，如果突然有團唔熟口面嘅灰飄過，佢都會識得叫佢登記。

結論係做HR嘅你唔怕失業。