7至8月係實習嘅季節。有啲同學搵錢買iphone，有啲去旅行打工，有啲去做冇乜錢嘅暑期工。如果你公司有請開暑期工嘅習慣，呢段日子HR梗會搵幾個青 春～真可愛青春～嘅暑期工喺公司走嚟走去。表面上佢地個個都係青春無敵嘅實習生，但其實佢地咩來頭、做啲咩你又知唔知？
1.皇親國戚實習生1號
呢種實習生得到絕對優待。大大皇上皇話見唔見工佢話事，幾時開始做佢話事，幾時走佢話事，去邊個部門做都係佢話事，佢實習完你仲存唔存在都係佢話事。各大 部門連同HR都要恭迎聖駕，負責做咩？佢話事啦…你唔好見人幾靚女就隨便走埋去，佢隨時係你老細個女（係咪親生我唔知）。
2. 至尊霹靂無敵皇親國戚實習生2號
HR知道要請佢地嘅時候通常都只係知道佢個名同埋email，甚至可能佢返工嗰日先知道佢嘅存在。佢地返工之後神出鬼沒，鍾意幾時出現就出現，佢返工做啲咩永遠係一個迷迷迷。你唔知頭唔知路走去告狀話佢曠工？你聽日唔駛返工喇！byebye你條尾！
3. Filing專用實習生
由上年個暑假到而家都又過咗一年。經過一年戰爭之後人類都係要繼續犯同樣嘅錯，堆積如山嘅文件繼續冇人file。老細每逢暑期就會叮一聲諗起暑期實習 生，Filing呢啲咁有意義嘅工作梗係交俾充滿幹勁嘅實習同學啦！過完暑假filing冇晒，又彰顯到老細嘅領導有方，又一次化解咗地球嘅危機。
4. 拼命三郎實習生
佢地嚟自香港各大院校，經過重重面試，憑住愛拼才會贏嘅心態，爭取到一席實習嘅位置。佢地大都希望畢業之後可以留喺公司繼續做，所以做得博過full time，斟茶遞水，上刀山落油鑊都絕無怨言。一心以為畢業唔駛愁失業，只可惜嘅係…佢地唔知道已經輸在精子形成前，皇親國戚實習生1號2號已經 book咗佢個位。
5. 絕種實習生
名符其實實習生，公司已經為實習生準備好晒全盤計劃，有晒時間表有晒plan，仲會安排專人照顧，做完幾個月仲會有檢討。佢地係真正有得實習嘅實習生，只可惜已經係頻臨絕種，香港仲有幾多公司咁有heart？
WhatsApp查詢