Employer Branding (僱主品牌) 呢樣嘢當然要靠自己建立，辛苦建立咗仲要好好守護，但一定要小心提防，一個唔覺意畀人無聲無色畀人破壞咗都唔知咩事。例如你有冇畀人偷過job ad? 不過可能畀人偷咗你都唔知…
「喂！你好！我係呀士網打嚟，有冇興趣試下喺我地網站登廣告呢？」
唔知由幾時開始，招聘網站愈開愈多，但事實係連大嗰幾間都少咗CV，點解佢地覺得HR會買多幾個覆蓋率更低嘅相同服務？
「你send啲資料睇下先啦。」
同事棉花糖例牌咁答佢。
呀士網其實我地一早睇過，都係登ad嗰啲嘢啦，本身都冇乜興趣，睇埋個package，價錢仲貴過租BB，真係搵靈體買。
睇返佢網頁又真係有好多公司登廣告，頓時心內充滿好奇，到底點解會有人類買？
不過我地呢啲忙碌嘅HR，好奇心短過金魚記憶力，因為電話一響，隨即又進入作戰狀態。
事隔一星期後，有一日電郵信箱突然出現幾封CV⋯⋯
「X你個X！呀士嚟嘅喂！」
睇到個logo，呢幾份CV係經呀士網寄嚟，但我地都冇落過廣告，點解會有CV呢？
聰明嘅你應該估到，冇錯，佢地將薯仔公司嘅廣告全部copy咗去呀士網。我地上呀士網一睇，嗰個廣告稱唔上廣告，只能稱為一pat堆埋一齊嘅字。
先唔講同唔同意畀你copy，但copy到咁樣會攪到人地以為我地HR登個廣告都咁求其，影響公司同我地HR嘅Employer Branding喎。最後，我哋當然係叫佢移除晒佢啦，
如果同樣嘅事發生喺大家身上，大家就要留意喇，雖然大家可能會唔駛錢收到幾份CV，但呀士網似乎利用緊其他企業嘅名氣去建立自己品牌，而且做法求其，仲可能影響你嘅公司形象同Employer Branding(僱主品牌)。做法是否適當，就留待大家自己判斷喇。
P.S. 佢仲幫薯仔公司設計咗個我地都睇唔明嘅reference code，真係有heart到呢⋯⋯
WhatsApp查詢