話說今日多啦A夢喺個P-file櫃入面走出嚟，走嚟同你講話佢係未來嘅你派嚟打9你嘅。佢喺個百寶袋入面拎咗6件法寶出嚟，樣樣都係HR很想要嘅法寶，不過佢只可以俾你揀一樣，而且每樣都會有副作用，你會點揀呢？
1. 面試測謊耳機
公司最怕請到冇誠信嘅人，經驗幾老到都可能走漏眼。用咗呢部測謊機，candidate一講大話佢就會喺你耳仔大叫：「佢呃人呀！」，讀心之神就是你。
副作用：用咗之後你會發現永遠請唔到人
2. 勞工法例記憶麵包
食咗勞工法例記憶麵包，香港僱傭條例倒轉都識背。唔怕俾人問到口啞啞之餘，仲隨時秒答KO老細嘅突擊測驗，極速升職冇難道。
副作用：唔好唔記得仲有反歧視條例、僱傭補償條例、強積金條例、稅務條例⋯⋯仲有世界各地嘅條例全部都要記，淨係記僱傭條例唔夠洗㗎。
3. 身體健康噴霧
只要將呢支噴霧噴喺全公司嘅人身上，從此全公司就會身體健康，全家都好平安。個個健健康康，以後冇人請sick leave，咁就唔駛處理啲又大張又細張嘅大大疊病假紙，諗下都爽。
副作用：少年你太天真，其實請病假唔一定要病的
4. 自動改錯帶
適合成日打錯字，經常因為文件出錯人面畀人D9嘅你。改錯帶scan過嘅所有錯誤都會自動消失，格式行距都幫你改埋，唔駛再畀人用間尺度字體大細。
副作用：因為長期唔駛用腦，好易出現腦退化
5. 統計署防護網
用咗佢之後，統計署從此唔會寄問卷去你公司，嗰啲乜鬼季度職位空缺問卷、乜乜行業調查通通唔駛做，唔駛再成日聽到統計署職員打畀你。
副作用：寄唔到畀你、打唔到佢你，佢哋會上門搵你。
6. 忠心耿耿藥水
趁新人返工嘅時候斟杯水俾佢，只要喺入面加一滴，就可以令佢效忠公司10年。10年冇turnover嘅平安日子，發夢都未見過呀！
副作用：用咗佢之後你可能好快畀人炒，因為呢度已經冇你嘅事喇
WhatsApp查詢