喺香港生BB，十個星期產假通常都走唔甩。十個星期話長唔長話短唔短，有啲公司都會請返個temp返嚟頂一陣。但請temp真係唔係話咁易，因為好多人都唔想做兩三個月就冇得做。
請唔到咁點算呢？老細唯有叫其他同事拍爛檔頂硬上啦。頂唔到又點算呢？薯仔公司嘅一位號稱「橋王」嘅team head就俾咗個建議我地。
「喂！薯蓉，頂唔住喇！冧檔喇！」
「呀…冇晒CV喇…你想見嗰幾個都冇嚟見工呀。」
「唔掂喎，呀May已經放咗一個星期產假喇。」
「我今朝先幫你出多咗次廣告。」
「其實我就諗到條橋⋯⋯」
聽到橋王話諗到條橋，我不禁倒抽一口涼氣，心諗一定冇好嘢。佢滿有自信咁繼續講：
「就咁嘅，我同呀May傾好咗，我叫佢產假搵幾日返嚟幫手。」
嗚哇！橋王果然名不虛傳！嚇屎朕喇！嗰口涼氣抽到我扯晒蝦⋯⋯
「呀⋯⋯你意思係佢放緊產假你叫佢返工？」
「係呀，佢自己都話ok㗎！」
「唔⋯其實唔係佢o唔ok嘅問題，呢個係法例規定嘅產假，佢放緊產假你唔可以叫佢返工。如果佢喺公司出咗事，邊個負責？」
「下？我係諗住佢生咗先叫佢返嚟喎。生完可以返喇掛。」
「生完都唔得，因為產假係必須要俾佢放㗎。」
「咁點呀？我冇人用喎。」
「得啦，我盡快幫你搵人啦，呢條橋唔work㗎。」
唉⋯好攪唔攪攪大肚婆⋯不過好彩橋王都唔係啲獨斷獨行嘅呀頭，起碼都識得問下HR先。最怕有啲呀頭問都唔問，擅自叫大肚婆返工。最後如果出咗事，單「人源災難」就肯肯定係HR孭飛。
WhatsApp查詢