嚇死HR系列之國慶大酬賓

「喂！請問係咪薯仔公司嘅HR，我發覺10月份糧好似計錯左。」

計錯糧呢句真係嚇到我食緊早餐份三文治都差啲啃親！不過我地做HR專業㗎嘛，計錯糧？冇可能！你嚇我唔到嘅！

「你好呀同事！可唔可以講詳細啲俾我聽？或者你俾個名我check下！」
「你唔駛知我係邊個，我睇返張糧單，你地做咩扣左我1/10個日人工呀？唔啱bo條數！」
「先生，或者你講個名俾我聽，唔係我好難幫你check喎！」
靜左….佢諗諗下終於覺得我有道理
「ok…D7689」
「嗯…staff no. D7689….梁先生，我check返你入職日係2/10，即係2號開始返工啦，所以1號係唔會出糧㗎喎。」
「我係計月薪㗎嘛！1/10重係國慶紅日，有薪假期喎！點解冇糧出呀？」

佢係咪搵工嘅時候撈亂左隔離個超市廣告：
國慶大酬賓！10月2號入職即送你10月1號不勞而獲一天，數量有限，送完即止！仲唔快啲send CV?

傻的嗎？

「先生，因為受僱日期由2號開始，1號係咪國慶紅日同你冇關喎！」
「吓? 乜公司咁鬼度縮㗎，嗰1日都慳？好心對啲同事好啲，一日就唔好計啦! 唔得! 我要打去勞工處問清楚先。」
人地港媽要人免費影相都付出個Like，呢位梁生係要不勞而獲!

呀梁生並唔係fresh grad，係社會上已經打滾左數十年，而且係有識之士。之前聽過同行講，話佢地公司一定唔請fresh grad，因為試過請過啲態度有問題嘅。不過我覺得又唔好一竹篙打一船人，薯仔公司都請到唔少積極正面、肯學肯做嘅fresh grad，只係有少部分入世未深未撞過板。係我地字正詞嚴咁話年少無知嘅fresh grad嘅時候，又有邊個去教訓啲恃老賣老嘅老屎忽。