有時見到自己公司有空缺，啲慈父慈母都會介紹下自己啲未搵到工嘅骨肉入嚟公司做，實行返工放工都可以約埋一齊，儲齊一家人就更加笑聲笑聲滿載溫馨，真係諗下都幸福。不過人嘅嘢真係好難預料，就算幾幸福嘅屋企都可能會有事發生…
孝子明好聽呀媽話，佢第一日嚟見工已經係一副孝子樣，問佢點解嚟見呢份工，佢都好老實話係聽媽媽話，自己又未搵到工所以嚟見下。同佢傾完都覺得佢幾乖仔，聽聽話話，正正符合部門經理嘅心意，最後都好順利咁請咗佢返嚟。
返咗工幾個月，部門方面對佢嘅表現都幾滿意，試用期都過埋，心諗呢位媽媽真係教子有方。點知….有一日部門經理慌慌張張咁打電話嚟，佢好急咁話：
「喂！記唔記得邊個孝子明呀？」
「記得，全家都好幸福嗰個吖嘛！」
「係呀！佢唔見咗呀！」
部門經理慌張嘅程度就好似唔見咗自己個仔，攪到我好似報案室啲呀蛇咁…
「唔見咗？！有冇搵清楚呀？唔見咗幾耐呀？」
「成朝都搵唔到呀，佢冇返到嚟公司，打電話又唔通！」
「咁呀…我幫你打俾佢呀媽問下啦」
由於孝子媽媽同孝子明唔係同一個部門，於是就由我去聯絡佢媽媽問下佢知唔知個仔去咗邊..
「吓！個衰仔矛返工？依個衰仔吖…喎奸日唔是同距依齊出文口喎，喎都唔是巧之距去咗鞭呀，等喎溫吓距先…」
孝子媽媽有啲鄉音，我好辛苦先聽得明佢講乜…
過咗十分鐘，孝子媽媽打嚟都係話搵唔到個仔，佢表示「好單先（擔心）」
如是者大家都著急咗一個鐘之後，電話終於傳嚟孝子明嘅消息，係部門經理打嚟…
「搵到喇搵到喇！」
「終於搵到喇？佢去咗邊呀？」
「唉…佢打咗俾我喇，話想請一日假喎。原來佢話今朝食早餐嗰時同媽媽鬧交，所以唔想返嚟又見到佢喎……」
到底鬧咩要鬧到玩失蹤唔返工？原來孝子都唔係好孝，要媽媽「單先」佢咁耐。最後孝子媽媽收到我通知話搵返個仔，佢表示「唔街晒，放先晒」部門經理都念在佢年紀尚輕，平時又乖乖仔，訓話幾句就唔再追究。
其實唔想返工好簡單，打個電話返嚟請個假唔駛屎，玩失蹤唔單止令人「單先」，嚴重仲可以當曠工㗎。
WhatsApp查詢