嚇死HR系列之極品面試官

我地HR做面試有時會安排分開first interview同埋second interview, 有時會做joint interview, 即係HR同部門經理坐埋一齊去做interview。Joint interview有個好處就係面試者唔駛走兩次，一次攪掂。不過我地做HR有時拍住一個極品嘅部門經理有時都幾難頂。

我同薯餅部經理「多啦Demon」拍住做interview都有好一段日子，深知佢份人不嬲都寸嘴，覺得自己係房入面好權威，鍾意將candidate踐踏到變薯餅。今日嘅受害者係一個出咗嚟做兩年嘅女仔，我地就叫佢做慘慘豬。

慘慘豬對答得體，而且背景學歷都十分符合佢申請嘅職位，唯獨是佢嘅要求薪金超過了我們budget，於是我必須要同佢確認一下：

「我見你要求人工寫咗呢個數，其實有冇negotiate嘅空間？」

「其實因為轉工都希望有少少調整」

「會唔會有空間可以商量下？」

就喺呢個時候，多啦Demon突然搭嗲…





「但我見你想要嘅加幅都幾大喎，比起而家份工多兩千幾蚊喎！」

「其實我公司本身都有雙糧，其實除返開都係差唔多」

登登登登～～多啦A夢拎法寶出嚟嘅音樂突然喺我耳邊嚮起，說時遲那時快，呢個時候係多啦Demon手上面已經出現咗一件法寶——計數機！！！

哇！嚇Q屎我咩？！你喺邊度收埋部計數機㗎？佢用得戚嘅眼神望咗我一眼再露出一絲奸奸地嘅笑容，係我腦海就傳嚟一把聲音：

「作為專業嘅interviewer隨身袋住部計數機係一件十分正常嘅事」😏✨

係我仲滴緊汗之際，佢用佢純熟嘅手指篤咗幾下，之後指住部計數機話：

「嗱，唔係喎，除返開雙糧，你要求人工都多過而家咁多喎」

「…其實都希望有少少調整」
「但係你唔多經驗喎」
「因為我而家都有呢個數目」
多啦Demon指指計數機「呢個數會唔會考慮呀？」
「….其實我寫呢個數真係我最低要求」

慘慘豬同我都已經變咗面青emoji…😨雖然佢青過我少少。慘慘豬最後都冇屈服係佢部計數機嘅淫威之下，企硬自己嘅要求。

其實我覺得慘慘豬要求唔算特別過份，只係每間公司都有佢嘅budget，只係薯仔公司滿足到佢。有時我地再三確定要求人工，係要清楚面試者嘅期望。如果你心中有一個數目（當然要合理，付合市場價格及你的經驗值），不妨老實回答，舉旗不定反而更會顯得缺乏自信。