嚇死HR系列之份form好難填

填表格速度因人而異，有啲人填得快過曾江染髮，有啲人就可能覺得份表好可愛，鍾意同份form談返廿零三十分鐘戀愛。其實份表格一般都係填下個人資料，唔係好難填，但有時總係會難到啲人…

有一日有位年輕嘅新同事返工，我俾晒啲表格佢入房慢慢填，過咗廿分鐘佢都仲係搾住枝筆望住張form，而且眼神有啲呆滯，心諗唔係晨早流流撞鬼呀？於是我問佢：

「你填成點呀？」
佢望著我又望下張表格
「呢度我諗左好耐…」
「有咩幫到你？」
佢好認真咁望住我
「人壽保險受益人呢度係咪可以填自己？」

嗚哇！原來唔係你撞鬼，係我撞鬼呀！受益人填自己咪即係屎咗之後要將筆錢過落去下面俾你？咁我要check check冥通嗰邊個率兌緊幾多港紙，唔係我話唔到俾你聽公司到時賠幾多俾你呀！

我斷估我都應該唔係撞鬼，唯有原諒少年佢太年輕，解釋返俾佢聽人壽保險係你屎咗之後先會有錢賠，啲錢係唔可以賠返俾自己㗎。

除咗人壽保險有人寫自己之外，有啲人仲諗到將緊急聯絡電話填自己個電話。OK…大吉利事你出事嗰陣邪惡嘅HR會打返俾你自己，同返你講你自己出咗事㗎喇。