唔想要個offer點算好？

Make offer可以話係一個我做HR最期待嘅畫面之一。梗係啦，見咗十幾廿人都唔啱，又俾其他部門吹到甩晒衫褲甩晒鞋，然後突然有一日個部門呀頭話揀啱咗，哇！嗰下真係要即刻著返晒啲衫動物衝去make offer。所以如果有candidate唔要我個offer其實真係好鬼傷我心，因為又要繼續輪迴。

遇到唔要offer嘅candidate其實都幾常見，而我通常都會了解下咩原因，睇下有冇彎轉。係呀，唔好以為請人嗰個永遠高高在上，而家二十一世紀喇，太陽都有後裔啦，老屎忽先仲當自己係太陽。

通常啲人用咩原因去唔要個offer呢？例如就有以下呢啲：

「我搵到第二份，人工高啲，福利好啲」
好正常好老實我鍾意

「我諗住去讀書，暫時唔搵工住」
咁你又嚟見工？玩嘢呀？

「我啱啱又買咗機票去旅行」
會唔會去晒啲旅行先返嚟搵工好啲呀？

「我屋企有事！我諗我都唔搵工住喇」
呢句都幾多人用，其實唔駛下下拖埋老母落水

上面講嘅其實都算係正常，有一次俾個offer個candidate，講晒成個package之後佢靜咗⋯⋯





「喂喂？個offer你o唔ok?」
「….我想諗一諗」
「覺得邊方面需要考慮呀？」
「…….」繼續靜咗
「喂喂？」
「人，有時好難做決定…」

大師！！做咩突然間咁禪呀？不過聽到呢句我真係冇晒聲出，佢呢句堅好用呀！

下次老細問你：
「點解你仲未交report？」
「人，有時好難決定交唔交…」

女友問：「幾時去日本shopping啫？」
「人，有時好難決定去唔去…」

呀媽問：「你幾時結婚呀？」
「人，有時好難決定同邊個結…」

雖然好難決定，但最後佢都決定冇要我個offer。
其實如果想要啲時間考慮好簡單，直接講就得，不過最好講埋想要考慮幾耐，一兩日其實都好足夠，唔係就好易令人覺得你冇乜誠意。又或者如果真係唔想要個offer，可以直接講話唔適合自己或者搵到好路數，我地慣咗食檸檬，所以各大求職者唔駛覺得尷尬㗎。