Reference check到底check唔check?

 

話說上次寫過有candidate見工冇帶正本俾我地check, 但有有心水清嘅朋友問：「正本都可以係假㗎喎，你地HR點知份野係咪堅？」冇錯！係呢個乜都有得假嘅年代，有A貨真係一啲都唔出奇！為防被騙，我地HR好多時都會做 reference check。

 

我諗大家去見工都可能填過一份reference check嘅授權書，其實HR係咪真係會拎你份授權去問你僱主或學校做background check？

 

俾你簽得呢份野當然唔會係冇用啦，通常我地會將呢份野寄去你舊公司，至於到時由HR填定係你老細親自填，就視乎公司本身嘅政策。

 

Reference Check Check 啲乜？

 

間間公司都唔同，基本上會問下你填嘅職位，人工，年資啱唔啱呀。以防有不誠實嘅求職者刻意虛報職位人工，明明做開薯片仔，寫做薯片管工，人工10000寫20000。有啲公司仲會問埋工作表現等等。

 

舊公司會唔會答？

 

只要有你授權，公司就可以答，但答幾多就視乎個別僱主policy。

 

 

Reference Check 唔簽授權會點？

 

呢個人想當有可疑。自己諗下點解釋。

 

被發現填報假資料會點？

 

咁就睇你好唔好彩，輕則收warning, 重則you are fired，因為好多公司都好重視誠信，如果使用假證明就直頭可以報警!

 

至於學歷，我地就可以直接send去問間學校有冇呢個學生嘅紀錄，甚至有啲學校係官網會有個page方便僱主做background check。

 

做左HR咁耐，都試過check到唔少人虛報資料。試過有一次經一間國際性大型recruitment agency請左個薯頭主管返嚟。佢有張新加坡大學嘅證書，當我去做background check嘅時候，人地間大學話根本冇呢個學生，而且當年張cert都唔係咁嘅設計，原來堅係假嘅。

我諗佢拎住呢張cert都呃左唔少公司，最後agency唔敢收我地錢，免費幫我地再搵人，果個人就當然冇得留低啦。

 

所以大家填報資料嘅時候請如實填寫，否則後果係可以好嚴重。 同埋HR淨係check呢樣check嗰樣都好多野做，唔好問HR朋友點解你咁多野做喇！