最近睇到呢個有關種族歧視條例嘅case同大家分享下：
星先生係南亞裔香港久居民，佢本身做技術員好多年，表現都好好，唯獨是唔係幾識中文。有一日，佢睇到XYZ公司有一個技術員嘅招聘廣告，佢覺得好有興趣，但係個JD就寫住一定要識睇同識寫中文，不過因為星先生真係對呢個職位太有興趣，佢自問喺工作能力上絕對應付得嚟，於是膽粗粗走去申請。
等了又等，星先生一直都收唔到XYZ公司嘅回音，但係有一日佢又再見到XYZ公司再出廣告，於是佢有再寄多一次去申請，結果又收唔到XYZ公司嘅回音，點知又有一日佢又再見到XYZ公司再出廣告，於是佢再寄多一次去申請。如是者喺幾個月之內，星先生申請咗N次呢個職位都得唔到回覆。佢覺得係因為佢唔識中文所以被拒絕，而佢又認為呢個職位根本唔係必須識中文，覺得XYZ公司係因為想篩走非華裔嘅candidate，所以用中文要求做藉口，於是佢向平機會投訴。
平機會收到投訴之後就向雙方解釋《種族歧視條例》，僱主喺訂立聘用條件嘅時候，如果冇充分理據證明條件係必須，而令到某種族較難符合條件，咁就有機會構成間接歧視。星先生呢個情況，如果僱主冇理據證明中文係必要嘅，咁就有機會係間接歧視。
不過呢個case最後雙方都和解咗，XYZ公司轉介咗星先生個申請去另一個英語部門面試，又話如果有其他啱嘅空缺就會叫佢見工。
好多時JD都係由Line Manager提供，但唔係佢話想點寫就點寫，HR都有責任post之前睇下有冇問題。唔諗多少少就可能會畀人覺得係歧視，之後啲麻煩嘢大家明啦。
原文刊於平機會2017年個案實錄
WhatsApp查詢