其實啲老細知唔知，亂請人係會害咗人

唔知大家上星期有冇睇韓國對德國呢場世紀大冷門，去到下半場，有位韓國球員被換入，但隔咗一陣又被調出。有睇開波嘅朋友都知，呢啲情況罕見，通常一係受傷、一係戰術調動，但無論邊個原因都好，嗰位球員都一定唔好受。請人都係一樣，有冇諗過當你興過采烈咁返新工，隔咗幾日會有人同你講：「我地唔再需要你喇。」

呀BU最近因為想搵間大公司發展，搵工後有兩個offer，最後因為茄子公司規模較大，所以推咗另一個offer加入咗茄子公司。

呀BU一向工作表現唔錯而且為人盡責，喺茄子公司做咗幾星期，同上司同事都相處融洽，點知有一日佢突然被老細召咗入房⋯

入面除咗佢老細之外仲坐咗個HR主管喺度，個HR同佢講：「唔好意思，BU小姐，你嘅部門需要重組，今日係你last day喇。」

全程佢老細都冇出聲，HR手起刀落，又斬一件。不過我諗做HR嘅大家都應該明白，HR做醜人是常識吧。

大家都應該知，試用期第一個月係冇代通知金的，即係話呀BU係咩都冇得賠就畀人炒咗，又要重新搵工，其實好陰公。

喺HR呢個部門，成日都聽到呢個部門、嗰個部門都話要請人，然後為咗請到人可以冇要求，諗住請咗返嚟先算。甚至聽過有啲公司嘅部門會為擴大勢力而請人，又或者根本冇咁嘅需要，純粹為請而請。

先唔講我地HR做完Recruit跟手又做Exit浪費嘅資源，更重要嘅係咁樣會害咗求職者。人地一心希望可以喺你公司建立career，但原來你根本冇打算畀career佢建立，結果無辜咁浪費咗人地嘅時間同機會。

公司請人前唔該諗清楚，HR更加要睇清楚，這是一個會影響很多人的事業。