近排大台黃金時段套劇又見到陳豪，個look一模一樣，冇留意仲會以為係之前嗰套使使行者。呢套劇一開始陳豪就有句金句：「好地地唔得嘅！」呢句真係好正，靜雞雞話你知，呢句金句我經常都喺心裡面叫出嚟，應用得最多係呢啲情況，唔知你又係唔係？
1.出warning/炒人
人人都唔想畀人炒，唔通個個HR都想炒人咩？特別係即炒case，直頭要金田一上身咁抽絲剝繭，搵出真兇，確保有証有據先可以入房講一句：「兇手就喺呢間房入面。」炒人好多嘢做，出信、入房畀信、final payment，樣樣都係又急又花時間。點解要攪到畀人炒？好地地唔得嘅？！
2.處理同事投訴
人類總要犯同樣嘅錯，呢個世界好難永遠和和氣氣，間唔中都要處理同事對某人嘅投訴或糾紛。遇著麻煩K屎，各執一詞，又要做中間人又要做和事佬，分分鐘攪你大半日。你地好地地唔得嘅？！
3.改payroll
每個月往往當你以為payroll已經準備就緒，總會在last minute有人通知你請no pay leave、stop payment、升職加人工，老細：「今個月做埋吖！」，即刻又要改過曬，好地地唔得嘅？
4.忙到pk統計署打嚟
佢地總在你最忙嘅時候送上奪命追魂call，喺你嘅洪洪烈火上倒上一枝油。「你好，我係統計署打嚟，關於份問卷⋯」啪！好地地唔得嘅？！
WhatsApp查詢