見工面試，其中一句好多人用嚟自殺嘅說話就係：「我想試下先。」簡簡單單一句，唔駛來回地獄又拆返人間，好多interviewer就已經判咗你死刑。
當然，唔係因為單純講一句說話就玩完，重點係呢句說話背後嘅搵工心態。每間公司都希望請到一個盡心盡力、有長遠工作打算嘅員工。邏輯其實好簡單，如果你係老細，你都唔想請一個做幾個月、甚至幾日就走嘅員工。
今日嚟見工嘅呢位人兄叫古仔，梳住2017男神系列髮型，雖未稱得上男神，都叫做斯斯文文見得下人。佢一坐得就chok個充滿理想嘅古天樂式眼神望住我，我唯有俾返個梁朝偉式眼神回應佢。喺一輪男人之間嘅眼神交流之後，我地開始講到佢嘅理想⋯
「你今次搵工其實有冇咩方向。」
「um……其實人最緊要係要知道自己想做咩。」
佢突然講起人生道理，不過呢句係啱嘅
「咁你自己想做啲咩？」
「我係好勇於嘗試嘅人。」
「你知唔知份工大概工作內容？」
「唔係太清楚，但我真心想試下。」
「有冇咩目標呀？」
「咩工都試下先咁。」
喺接下嚟嘅對話，「我想試下先」呢句說話再出現多咗幾次，講咁多次唔入腦都唔得。之後古仔再chok唔出古天樂嘅眼神。想節能，能呔能，我決定幫公司慳返啲電費結束今次interview。
其實未搵到目標或者冇經驗都唔緊要，見工前可以做下research先，就住你嘅經驗同長處，演繹畀面試官知你可以點樣勝任呢份工作，比起一句「試下」，說服力就大得多。只要保持積極嘅態度，顯示出有長遠發展嘅打算，唔會試下就走，好多時都可以輕鬆過關。
WhatsApp查詢