喺大家通街走捕捉小精靈嘅時候，你又知唔知其實辦公室入面早已潛伏咗好多小精靈？有啲仲好可能會咬你，及早發現，有備無患。
1. 音波蝠
Pokemon Go入面周街都係波音蝠，喺職場入面就經常有音波蝠通處飛。如果你有嘢未俾佢，佢會用佢地嘅奪命煩音追到你瘦。音波蝠係冇得避㗎，認命啦你。
稀有度：1
2. 傻鴨
你唔好以為傻鴨真係傻，其實佢地都係扮傻。做錯嘢嘅時候都會扮傻咁話「唔知，唔知」「冇聽過，冇聽過」。對付傻鴨嘅最有效方法係black and white紀錄，講過咩都send個email俾佢，等佢冇得再進化做高超鴨。
稀有度：20
3. 大食花
如果你發現pantry個雪櫃同埋零食櫃成日都少咁啲嘢食，你公司就好可能有大食花出沒。大食花極難補足，因為佢專揀冇人嘅時候攞嘢食。不過如果你刻意佈下陷阱，擺啲食物去吸引佢，想捉佢都唔係冇可能。
稀有度：29
4. 催眠獸
故名思義呢種精靈最擅長發出催眠音波，講嘢永遠冇高低起伏而且超級長氣，通常都係活咗多年、鍾意演嘢或不擅表達嘅老seafood。你永遠都收伏唔到佢地，因為佢一講你已經瞓著咗。
稀有度：35
5. 死喵怪
喺辦公室冇咩委屈得過遇到死喵怪，俾死貓人食係佢地嘅專長。等級高嘅死喵怪甚至會令你食咗死貓都冇聲出，可恨過魅力四射嘅火箭兵團。遇到死喵怪要極力反抗嗌「唔好！」
稀有度：41
6. 靈異種子
靈異種子係好靈異嘅精靈，佢地永遠冇腳步聲，突然出現嚇你一驚。如果你發現你老細或者你敵人係靈異種子就要格外留神，唔覺意俾佢捉到你痛腳，你隨時要做全職精靈訓練員。
稀有度：52
7. 噴火蟲
傳說話噴火蟲可能係進化失敗嘅噴火龍。佢地經常都維持噴火狀態，面對每件工作會好燥底，覺得全世界都得罪佢。但因為職位低微同埋進化失敗，所以永遠只能噴火燒著自己，噴完火之後都係要繼續做。
稀有度：68
8. 巴打蝶
巴打蝶係男性精靈，專門喺公司入面獵食。多女同事嘅地方就會吸引到佢地出沒，當佢地圍住個女同事氹氹轉，盲嘅都知佢地想點。尅星係俾卡超（下述）。
稀有度：76
9. 車你龜
今時今日嘅香港地，養得起架車都幾威威。有一種職場精靈特別鍾意車埋同事，經常發出「車你，車你」嘅聲音去吸引其他人坐佢架車。不過當你坐過佢架車就會發現佢永遠行龜速，條路行70都永遠行50。安全駕駛好緊要，不過可唔可以唔好俾巴士爬頭。
稀有度：88
10. 俾卡超
佢地係女性精靈，擁有十萬伏特嘅電眼，桃花極旺。因為吸引力高亦引嚟狂風浪蝶，經常要「俾卡，俾卡」俾好人卡殺退巴打蝶，同時引嚟羨慕同埋妒忌嘅眼光，甚至因為派得太多好人卡而深陷被排斥嘅險景。
稀有度： 90
WhatsApp查詢