見工奇行種系列之我係萬能key

呢日有位著住full suit嘅年輕男士嚟到薯仔公司見工，佢件西裝同公事包都有啲oversize，可能係爸爸借俾佢著，算啦...fashion嘅野我都係識條毛。不過總算整整齊齊，幾有誠意咁。

話說當日係joint interview，薯仔我同部門經理一齊接見呢位誠意哥。講少少誠意哥嘅背景：fresh grad剛於香港最top大學畢業，中學及大學成績優異，冇工作經驗。

好…開始面試！

薯仔：「你介紹下自己丫。」
誠意哥：「兩位你地好！我叫誠意哥，誠意幼稚園畢業，之後入左誠意小學，之後就升左上一間一流嘅中學，F.5會考嘅成績中文係A，英文係A，數學係B…a-level嘅時候中文A，英文A….於是入左一流嘅大學，成績係………」下剔100字…

一路聽住佢吹噓自己嘅過去…部門經理忍唔住制止佢...

經理：「不如你講下點解申請我地呢個職位？」

誠意哥：「其實我對你地薯仔公司好有誠意，我唔單止申請左你地呢個職位，其他職位我都有寄CV！」

聽到呢度已經知道誠意哥非池中物….佢好似唔係好明條問題問咩喎。

薯仔：「其實你自己搵工有咩目標？」
誠意哥：「薯仔公司希望我做咩就做咩，只要係你地公司嘅職位我都肯做，我真係咩都肯做㗎！」

佢好似都係聽唔明喎！誠意哥你想做新一代萬能key？咩角色都handle到？





經理：「咁即係OA (Office Assistant)都肯做？」

誠意哥認真咁諗左一陣，我以為大學畢業中英文搾火箭嘅佢真係想做，點知佢話：

「….OA係咩嚟㗎？」

我地兩個個樣即時變左面青emoji😨😨

薯仔：「即係Office Assistant….幫手送文件嘅」
誠意哥：「我都ok呀，我可以由低做起」

聽到呢度要用噴血emoji先可以表達到…..強烈建議emoji加個噴血樣俾我

噴到成地血之後我地已經冇氣力再同誠意哥糾纏，於是叫去返去等消息…

見工介紹自己highlight自己嘅強項係冇錯，不過唔洗hardsell嘅，講自己成績有幾好其實冇咩意思。皆因誠意哥都應該見到我地兩個係有眼睛嘅地球人，張cert咁靚仔我地係睇到嘅。反而保持應有嘅謙虛，講下自己係學校做過啲咩學到啲咩更實際。另外，目標清晰好重要，有心見一個職位就唔好諗第二個，三心兩意更突顯自己唔知自己想點。

呢個故事又印證左學業成績不是一切