見工前難免會緊張，坐係面試室外等候嘅感覺就好似玩跳樓機等跳樓咁。有啲人會選擇坐係度準備下，或者㩒下電話打發時間。不過始終有啲人嘅行為係一般人類無法想像嘅…佢地就係傳說中嘅「見工奇行種」。
根據日本人類奇行研究院院長正野一健教授嘅研究指出，見工奇行種嘅行為模式大致分為三級，第一級只會係面試室外出現異常行為，第二級會係面試期間出現失控，第三級係最唔穩定嘅一種，因為冇人知佢地幾時失控。
見工最忌遲到，今日池佐島野香小姐十分怱忙咁嚟到面試地點，但係佢已經遲左15分鐘。不過佢好好彩，仲未輪到佢見工。
於是佢乖乖地填好晒所有表格，池佐小姐仲有時間去埋廁所倒夜香..唔係…係池佐島野香小姐仲有時間去埋個廁所，之後就坐係度等。池佐小姐選擇玩電話嚟打發時間，但唔知係咪坐得太耐，忽然係度左望右望唔知搵咩。由於薯仔呢個時候忙住幫手check池佐小姐嘅cert，所以對佢都不以為意，淨係見佢之後繼續玩電話。
說時遲那時快，終於輪到池佐小姐interview。HR薯仔帶左佢入房之後，眼尾見到池佐小姐頭先坐嗰張梳化上面有啲野喎。咦….係佢部電話喎，咁唔小心放左係度呀？！行到埋去再望真啲…咦…佢部電話後面連住一條長長嘅電線，一路連到去梳化後面個插蘇度。咦!! 個插蘇上面插住左池佐小姐嘅哈囉吉蒂usb差電器差緊電…唔係…係偷緊電呀！
當自己屋企咁喎！池佐島野香小姐尋晚梗係遲左瞓又遲左起身，所以遲左差電又遲左出門口，逼不得已走投無路所以要嚟人地公司偷電！個插蘇咁隱蔽都俾你搵到！為左差電掉低個電話唔理，為左差電你到底可以去到幾盡？
雖然知道池佐小姐好心急差電，但係就咁放係度俾其他人拎左就麻煩。所以HR同事決定幫佢收起先，等佢見完工後交返俾佢。之後聽返Interviewer講，池佐小姐見工表現不錯，面試期間又冇任何異常嘅舉動出現。
正野一健教授指出，池佐小姐正正係第一級奇行種，只會係面試室外出現奇異行為。佢覺得池佐嘅行為係十分危險，一個唔覺意電屎左點算？而且不問自取嘅行為分分鐘俾人視為賊也。佢建議如果大家想差電嘅其實可以問左人先，如果唔想問人，或者可以試下將電話收係梳化底以免俾人發現。
WhatsApp查詢