做interview嘅時候，作為interviewer，真係好想了解下candidate點解會嚟見呢份工，點解出面咁多份工、咁多間公司，要嚟申請我地呢份？所以面試時好多時都會問下「點解會申請呢份工？」
有一次，有位同事介紹咗佢嘅朋友上嚟薯仔公司見工。佢係一位中年叔叔，一見到佢成個老實樣，你就知佢係老實人。入到房佢笑容滿面，十分有禮貌，又加多啲印象分。同佢寒暄咗幾句之後，又係時候要了解下佢點解嚟見呢份工：
「老實叔叔，請問你點解對我地呢個職位有興趣？」
「呀⋯⋯老實講，其實我冇乜興趣。」
我當場呆咗一呆⋯⋯好似真係冇聽過有人咁答。唔通老實叔叔準備咗一個好有創意嘅答案？所謂冇興趣其實另有含意？
「老實講，其實我今次都唔係好想嚟見⋯⋯」
唔⋯估唔到叔叔創意能力好高，莫非佢想置諸死地而後生？？
「我個人好老實，我都唔知呢份工做咩嘅，我個friend叫我嚟咪嚟囉。」
「你冇興趣又特登走一轉？」
「哦，俾面我個friend囉。個friend介紹，唔好意思推嘛。你明啦～」
嗚哇⋯說好的創意呢？？莫非老實叔叔你真係咁老實嚟運吉嘅？
「你嘅意思係根本一啲興趣都冇？」
「係呀，我仲見緊其他工，唔係個friend咁想我嚟見，我都唔嚟啦。」
原來老實叔叔係講真㗎…佢真係好老實，今日嚟都係為咗嚟浪費下大家啲時間㗎咋。不過老實叔叔咁老實都好嘅， 好過做完一輪先同我講冇興趣。
其實如果真係冇興趣，打個電話嚟話我知就得，唔駛特登上嚟講㗎。不過老實叔叔都幾有義氣，個friend叫佢嚟就俾面嚟，佢地一定係共赴患難絕望裡緊握你手嘅朋友～呢啲friend，你話去邊度搵？
WhatsApp查詢