見工奇行種系列之我係萬能Key續集

記唔記得之前嗰篇《我係萬能Key》？（如果你未睇過可以click返下面條link）

呢日又有一位年輕人出現係我眼前，雖然佢條西褲有啲吊腳，但佢應該覺得自己好俊俏，我就叫佢做俊俏兄。

俊俏兄背景同誠意哥十分相似，fresh grad，成績又係唔錯。不過我叫佢萬能Key唔係因為佢咩職位都肯做，我地睇下佢見工嘅時候做咗啲乜…

話說俊俏兄今日見嘅係一個需要做創意寫作嘅職位。一開始同俊俏哥嘅對話十分順利，直到我問佢：

「你以前有冇做同creative writing有關嘅工作或者參加過有關嘅活動？」

「有呀，我讀書嗰時有寫下blog，因為我鍾意睇電影，所以會寫下影評咁。」

正打算繼續問落去嘅時候，俊俏兄突然間爆出一句：

「其實我有個偶像！」

「呀？」





俊俏兄繼續娓娓道來：「我偶像係黃曉明，我覺得佢好努力，係各方面都好成功！」

喂呀～嘔血emoji係咪仲未出呀？關海錦蛋糕咩事呀？😨其實我唔想知囉，於是我企圖拉開話題：

「哦…咁你對自己嘅將來有咩期望？」

一出口我就知我錯喇…佢即刻食住個勢上…

「我真係好希望成為佢！雖然好困難，不過我爸爸媽媽都好支持我呢個夢想！」

嗚哇！俊俏兄係想key舊海錦蛋糕落自己度呀，不過真係唔好意思，我真係睇唔出曉明大哥點key唔到落你度，你爸爸媽媽表示支持你可能只係唔想hurt到你😭….而且angelababy係唔會鍾意你㗎！

「其實你會唔會係想去做同表演有關嘅工作？」

「如果有機會我都好想試下㗎！」

如果係咁我諗俊俏兄你應該去錯公司見錯工喇，我地冇得俾你坐係度表演工作，我地真係要人工作㗎！既然俊俏兄咁坦白，我只好同佢講byebye。俊俏兄同誠意哥一樣都係犯咗同一個錯誤，去見工目標要清晰，唔好俾人覺得你根本志不在此。至於偶像呢家野，我諗大家見工都唔會拎出嚟嘅…正常嚟講