見工奇行種系列之口痕超與秀髮盈

我叫口痕超，可能太緊張，我每次去見工嘅時候個口就會超痕，無論我點搲都會痕到呀媽都唔認得。不過有一日我終於搵到一個解決辦法，就係我最愛嘅香～ 口～膠！自從發現呢個方法之後我每次見工都會食住香口膠，咁會令我舒服啲。之不過講住嘢香口膠真係好麻煩，舊膠喺個口入面浪嚟浪去，有一次差啲成粒膠 飛出嚟痴喺個HR塊面度，真係嚇鬼死佢。不過呢個方法真係好神奇！我食住香口膠唔會再驚，對答如流，口材好過黃子華。雖然我到依家都未搵到工，但我相信香 口膠係得嘅！

正解：
食香口膠俾人感覺好輕佻、冇禮貌，無論你有幾緊張或者有幾多口氣，都唔應該住香口膠見工。

個案二：秀髮盈

我叫秀髮盈，我有一把引以自豪嘅長髮，你有冇睇過我個洗頭水廣告？冇？冇可能！close up嗰把頭髮咪係我㗎囉！因為我把頭髮就係我賣點，所以我見工嘅時候最鍾意show off下我把秀髮。點show? 好簡單！我一路介紹自己就一路係咁攪我把靚髮，攪呀攪~fing呀fing~ 引到個interviewer望到我把秀髮為止。有時我仲會一路講一路撥，有次間房細，個interviewer坐得近，一撥啲頭髮髮尾飛咗落佢塊面度， 我諗佢一定係覺得好很柔順，差在唔好意思問我用邊隻洗頭水。雖然我仲未搵到工，不過我相信有一日會有公司因為我把秀髮請我嘅！

正解：
頭髮髮呢家嘢越撥得多就越顯得唔夠淡定，邊有人得閒留意你髮尾有冇開叉，撥少幾下當幫忙，眼都花埋喇。

喺以上嘅個案我地睇到兩位奇行種出現嘅奇行都係事出有因，只係佢地唔明白自己嘅行為有啲奇怪。如果大家遇到奇行種，我建議大家不妨花啲心機了解下同關心下佢地，幫佢地搵出自己嘅問題，從而搵返個好歸宿。