見工奇行種系列之「不能打開的信封」

薯蓉仔我身為食物鏈嘅最底層，日日要見盡不同老闆同candidate，為左減壓，閒時都會幫d candidate改下名，就好似今日要見個佛地魔先生咁。

話就今日佛先生著到官仔骨骨，老西都出埋嚟，一身smart look嚟見工。搞到我薯蓉仔都要chok住打聲招呼。

本來一切都十分之順利，佛先生填好晒application form，交齊晒cert俾我地做checking...

睇返佛先生嘅CV，原來佢浸過咸水返嚟，重讀過法文! 但睇哂成個file都搵唔到佢讀大學時既證明。就係呢個時候，有一個信封係個file跌出嚟。呢個信封未被打開過，信封面寫住一堆雞腸，我薯蓉仔都叫讀過下書睇得明university隻字，估計應該係大學寄嚟嘅信。

「先生，請問有冇帶到大學既證書嚟 ? 」
「er….好似有。」
我指住封信 :「係咪呢封? 但未開過喎。」
佛先生認真咁望住我話 :「 唔開得㗎!」
我都一臉認真咁望住佢 :「其實…會唔會係你大學嘅transcript?」
「呀…真係唔開得㗎! 我係u度拎呢封信時，個職員叫我唔好打開，所以我一直都冇打開。」

佛先生認真咁答…神色凝重…到底我係咪聽緊鬼故? come on! 打開後哈利仔老豆會復活嗎？

大家都應該睇過哈利仔! 「不能說的名字」佛地魔搞餐死拖左7集終於都死左…今日呢位就係有個「不能打開的信封」嘅佛先生!

我心諗佢應該誤會左職員意思，人地叫佢唔好即場打開，佢就以為一世都唔可以打開!!

始終信件係candidate嘅私人野，我唔方便幫佢開。

「唔緊要，請問你有冇其他reference可以提供?」
「……好似冇。」

佛先生認真咁思考左一陣，終於的起心肝仔拎起個信封，一手撕開佢！哇！一打開結果發現入面真係有張transcript呀!

唔知係咪fresh grad關係，我覺得佛先生為人比較單純天真，但係都幾有趣。順便提提各位畢業生，去見工可以帶埋transcript，因為好多interviewer都會想睇你讀過D咩！