見工奇行種系列之問題書生問夠未？

「大致上都冇咩問題⋯⋯」

少年我今次唔會咁天真喇，你嚇我唔到嘅！你一定有問題！！

「呀！我想問呢，工作時間點樣㗎？係咪要輪班？」

「咦！第一次面試同事同你講過工作時間同埋要輪班喎」

「係呀，不過想問多次」

知又問？我忍你！

「呀！我仲想問早班返幾點？」

「之前同你講過係返6:00」

「我都記得係返6:00，想問清楚啫」

嗚！我忍忍忍忍忍忍！





「咁你覺得個offer點？」

「我想諗吓⋯⋯」

「其實考慮啲咩呀？」

「冇咩…想諗下仲有冇問題想問」

嗚呀…忍忍忍忍忍忍住呀！！

「唔緊要，你諗完今日內覆我啦」

同問題書生博鬥完一輪之後，即刻要食返幾粒仙豆續命（其實係日本手信wasabi青豆），隔左一個鐘問題書生又再打嚟問問題⋯⋯

「我諗到有咩問題喇，想請問輪班有幾多班㗎？」

「3班，時間分別係咁咁咁」

「哦⋯⋯我仲想再諗諗有咩問題，可唔可以俾一晚時間我再諗問題」

我聽到差啲噴wasabi，佢唔係諗做唔做份工，係仲要繼續諗問題…嗚！心呼吸！心呼吸！

「咁唔該你諗清楚一次過問！」

過咗一日後，問題書生依照約定又再致電…

「我諗咗成晚諗到個好重要嘅問題！返朝早6點嗰班，我應該坐咩車返工？你有冇咩建議？」

嗚呀！媽咪呀！我有冇聽錯？佢竟然要我教佢點返工…

「其實你住嗰區，會唔會你自己清楚啲」

「咁早我真係唔知坐咩車，你俾我諗諗」

嚟到呢度..真係忍唔住喇！

「又諗？你諗咗成晚喎」

「俾我諗多5分鐘，我諗完打俾你！好快好快！真係好快！」

其實我心裡面自私地希望佢諗完唔好嚟，點知佢5分鐘之後真係打嚟話決定要個offer⋯⋯朝廷正是用人之時，HR有時都冇辦法。好多人以為HR操生殺大權，其實事實未必如此。

係呢個時候，你可能以為故事已經完結，其實我都以為係。但正所謂天無絕人達之路，柳暗花明又一城，過咗兩日我又收到問題書生電話，佢話都係諗唔到點樣返工所以唔嚟喇！希望真係在明天㗎！