見工奇行種系列之問題書生問題多

面試去到尾聲，求職者喺呢個時候通常已經俾人問到頭暈眼花，就係你最脆弱嘅時候，邪惡嘅HR往往會使出最後一擊：「你有冇問題想問呀？」

有啲人會唔知問咩，有啲人會把握機會了解份工多啲。不過今日呢位「問題書生」有佢特別嘅應對方法…

問題書生呢日係做第二次面試，經常幫我做「第一輪面試」嘅Reception姐姐今日俾我嘅評語係：「溝通不能夠！」

Reception姐姐話佢閱人無數，一眼就睇穿人地西裝之下毒味甚濃，不過作為專業嘅HR梗係唔可以以貌取人啦。

問題書生一身標準fresh grad打扮，畢挺黑色老西配白恤衫，明明唔係fresh grad扮fresh grad。不過面試由開始直至我問最後一條問題之前，問題書生一直對答如流，溝通很能夠，喺我以為Reception姐姐斷錯症之際，點知精彩在後頭…

去到尾聲我如常咁問：

「你有冇問題想問呀？」

問題書生十分鎮定咁答：

「呀！問題！有！你等一等！」

就係呢個時候，我見佢右手高速咁伸入西裝褸左邊衫袋內。「等我變身先！」此時問題書生充滿自信咁嘴角上揚，好似變咗另一個人咁…呢個人相當有嫌疑！喺我以為問題書生會拎把槍出嚟暗殺我之際，佢從佢衫袋裡面抽出一張紙...

「等我睇下先，我抄晒啲問題係度。」

我倒抽了一口涼氣…😨

OK! 你嚇我唔到嘅！雖然我第一次見人問問題都要準備講稿，不過有準備係好事，即管聽下你問乜。

我故作冷靜咁點咗一下頭，問題書生立即連珠炮發：

「我想問下有咩福利㗎？」
「人工幾多錢呀？」
「有冇交通津貼㗎？」
「醫療福利係點樣claim？」
「試用期幾耐？」
「過左試用期有冇人工加㗎？」

咪住先！咪住先！我地好似未話請你喎！唔駛咁猴禽嘅！

「其實我地確實請你嘅時候會再詳細說明」

「明白…咁我可唔可以問埋最後一條！」

「……..好…你問啦」
…
….
…..
「晏晝呢度附近有咩好食？」

嗚呀！問題書生你真天真假天真，我怕我忘了怎麼區分...咁快就擔心食飯？你下個問題會唔會問我廁所繁唔繁忙？

「呀…..或者你一陣可以落去睇下」我無奈地回答

俾問題書生問完一輪之後，今次頭暈眼花嗰個係我。

面試時好多人都會忽略咗問問題呢個環節，大家去見工不妨準備定有咩問題想問，其實呢個係攞分嘅好機會，因為好多時僱主都希望求職者可以主動了解份工作多一點。不過薪金福利最好等僱主主動講，唔駛心急，請你嗰時一定會俾你知嘅！

只不過，朝廷正是用人之時，最後我地都決定要請問題書生，點知係我俾offer嘅時候，佢竟然再次使出佢嘅自殺專用必殺技……