見工奇行種系列之「我好肚餓呀！」

曾經作為求職者既大家， 都試過填完application form後要坐低等一段時間先被召見! 有時等得太耐，各位會發下呆、玩下電話都係人之常情，但係有一次有位candidate真係嚇親我…

話說當日皇呀姐召見嘅candidate準時到達office, 我地暫時比住個名佢先，就叫「百力滋小姐」

起初百力滋小姐都正正常常咁填完application form後坐低左。當佢填完form我就去收佢啲cert做checking

「小姐請問有冇帶正本？」
「冇呀，不過呢度有疊copy左嘅cert係俾你地copy㗎!」
我憑我聰明才智用左1秒時間去理解佢嘅說話! 心諗…幻覺嚟啫! 你嚇我唔到嘅！！
「小姐，你嘅意思係你copy左啲cert俾我copy?」
「係呀！啲copy我要返，你等陣睇完比番晒我！」
百力滋小姐再重申copy係比你copy嘅。呢刻，黃浩然同翠如bb係我腦海出現，師父明白了!

當我係度研究緊佢生平歷史嘅時候，突然我隱約感覺到有個黑影係我前面飄嚟飄去。都係嗰句，幻覺嚟啫! 你嚇我唔到嘅!! 我鼓起勇氣抬起我的頭來，結果見到百力滋小姐已經飄左係我面前!

「請問有咩幫到你?」
我見百力滋小姐眼神充滿左忐忑同不安。
「呀…嗯…其實我呢…今朝未食早餐呀，而家有啲肚餓… 」百力滋小姐心裏應該唱緊忐忑…依哇哇～呀～
我嗰下真係O左咀，我明明約小姐你11點㗎，點解唔去麥當當嘆個早餐先嚟呀？同埋你肚餓關我卵事咩？
係呢個時候我發現百力滋小姐將佢忐忑嘅眼睛移左去我旁邊個櫃度…
「嗯…..我見你後面個櫃上面有包百力滋…可唔可以請我食呀？」大家宜家應該知點解我會比呢個稱呼佢啦！佢竟然連我3點3嘅零食都發現到!!! 呢一刻，大家覺得我應該點做好呢? 唔俾佢驚佢餓死沙場，俾左佢我3點3食咩? 鳴哇!! 其實我做左咁耐野真係未試過俾人咁問！輪到我想唱返首忐忑！
於是我都係同自己講!! 幻覺嚟啫! 你嚇我唔到嘅!!
「嗯…小姐其實interview差唔多開始！或者你見完落樓下食返個lunch啦！」講到我都想去嗰間為你做足一百分既餐廳食番個一哥焗豬扒飯加凍檸茶。於是我保持鎮定兼靜靜雞收返埋我啲3點3。

一句成功擊退左百力滋小姐之後，我皇呀姐就召見呢位咁有趣嘅candidate，唔知佢會唔會同皇呀姐講我唔請佢食百力滋…

到最後我真係做左件好白痴嘅事，就係拎堆copy去copy, 你地唔好偷偷地笑9我呀！ 其實各位見工可以帶齊正副本，另外，如果interview時間比較早，都建議大家食定小小野先去。因為有時要就老細時間見人，可能各位等候時間較長! 多多見諒呀!