[薯蓉信箱] 冇做嘢一年會畀人壓價?

1.我最近搵到份新工下個月返，但好早之前買咗機票去旅行，第一個月要請假，如果返工前就話要請假，印象會好差嗎？

返工前講定要請假，比起你返咗工先請假印象會好得多。一來起碼主管有個預算，可以預先安排人手，HR亦都可以考慮需唔需要延後你返工日期。另一方面，如果你返工先請假，主管可以唔批准你放假，到時你自己可能更加失咗預算。一般公司都通情達理的，如果你事先講明，可以畀到人負責任嘅印象，如果等到返工先講下星期要請假，到時印象會更差。

2.我本身有十年工作經驗，因家庭問題quit咗上一份工近一年，呢一年我都有進修，嚟緊想再搵返工但好驚畀人壓價，我係咪唔可以要求返以前嘅收入？

好多人都有類似嘅諗法，以為離開職場一段時間就唔應該要求返以前嘅收入。但其實一年唔算太長，如果你有相關工作經驗，首先你唔好睇低自己，interview時解釋返冇做嘢嘅原因，亦要畀interviewer知道呢段時間你有進修唔係白過。只要顯示到畀interviewer睇你嘅能力、價值所在，要有返之前嘅收入甚至更高都有可能。