HR打風4件事

無論打過幾多次風，HR嘅抬頭電話都會出現一浪接一浪嘅湧浪，查詢公司落波嘅返工時間界線。如果撞正月中payroll大潮，HR tray頂更可能出現山泥傾瀉，隨時將HR同事活埋。除咗應付呢啲突如其來嘅工作，作為專業嘅HR，打風仲有幾件事係應該要做。

1.出email remind下大家

無論打幾多次風，人類都總係會問同一個問號：「聽日幾點落波要返工？」唔想答完又答，不如出個email提提善忘嘅人類。不過要有心理準備，出完個email你個電話都係會繼續響，因為有人會比較鍾意打熱線電話。

2.打畀約咗見工嘅人

對一般candidate嚟講，會擔心打風會打走埋個見工機會。另外有種非一般嘅candidate叫見工奇行種，佢地可能會8號風球去到公司要求見工以表誠意。為咗candidate安心啲，不如打風前通知佢地一聲。

3.打畀返工新人

除咗見工嘅candidate，仲有聽日準備返新工嘅未來同事。有啲迷惘小羔羊，可能會以為8號風球HR會如常服務，同見工奇行種一齊企喺門口等你返嚟。改期定晏啲返，打個電話畀佢地啦。

4.Training活動要安排

如果安排咗活動或者training，撞正打風真係喊三聲，因為代表要從新安排過。以免打緊風都有人搵你問點算好、打完風第二日一早又不停有人問你點安排，不如早啲安撫下佢地啦。