HR出門三件事
HR呢個部門真係充滿挑戰嘅地方，有一次，我喺一日之內畀人話我塊面成日向住太陽落山方向、又有人叫我食黃色長條狀水果、再有人請我食死咗嘅Hello Kitty，嗰一日係我人生有紀錄以嚟最down嘅一日之一。
之後我問自己究竟做錯咗啲咩？其實我嗰日只係太多嘢做唔記得笑。然後有個燥底舊同事話我計錯佢final payment，實情係佢自己唔識計。再之後有個同事話我整唔見咗個p-file，事實係第二日喺佢自己座山入面搵返出嚟。嗰日之後，我發現我地做HR出門要帶多三樣嘢，咁嗰日應該會過得好少少。
1.面具
Interview唔好西面我知，但原來而家坐喺個位都唔可以唔笑，因為會畀出面啲同事話我地塊面一致向西，HR變WestR。以後出門口前要帶返個笑容面具，由坐車笑到返公司。可能第時畀warning letter都要笑住畀，「親，呢封係你嘅警告信😊假一賠十」
2.兩條蕉
做HR有時唔知點解會得罪人，甚至係你得罪咗都唔知。可能係你interview問左啲普通嘢但中咗人要害、或者有人遲交OT form你計唔切，佢地都會暗噁底叫你食蕉。香蕉有豐富維他命B可以紓緩神經，幫助減壓，以後出門口食定條蕉打底，如果有人叫你食蕉，你可以請返佢食：「我食咗喇，你今日食咗未？」
3.米尼滷味
死咗嘅Hello Kitty老是常出現，冇人工加、冇職升、冇bonus、請唔到人都係HR話嘅，但明明好多人都有份決定。死咗嘅Hello Kitty就好似神經病毒咁侵害你神經，食咗之後眼淚會流乾、抑鬱到爆瘡，久久不能釋懷。但死Hello Kitty周圍都係，食環都清唔曬，唯有送返啲意頭嘢畀佢：「你米尼咗滷味未？」
WhatsApp查詢