HR VS 求職者聯盟

HR VS 求職者聯盟 ［冇劇透］

Marvel攪咗十年，終於嚟到終極一戰。大奸角Thanos終於出場，唔駛食開心樂園餐都可以集齊一套無限寶石嘅佢，對付啲英雄就好似食生菜咁。奸角做到咁威威都好少有，喺現實世界入面，一向「被」做開反派嘅HRanos就冇咁好彩，面對一眾求職者聯盟，無限手套就冇喇，無限嘔吐就有。

無業隊長

隊長係無業遊民嘅代表，自從畀舊老細炒咗之後就無所事事。CV勁多勁長空白期，不思進取唔進修，靠黐有錢佬飲飲食食為生。你問佢個嗰段時間做啲咩，佢會答你：休息下⋯

富二代Ironman

家中唔憂柴憂米，返工係兼職，正職係老細。出嚟搵嘢做係因為爸爸要佢出嚟吸收下經驗，又或者太得閒所以出嚟搵啲世藝。嗚哇⋯你都係留喺屋企整玩具唔好侵略我地啦⋯

天之驕子雷神

雷神係天之驕子（佢以為），DSE手執幾支火箭，讀神級大學。見工時不停show off自己有幾多碌火箭，忘記地球根本唔需要火箭，最後覺得HR唔要自己係痴線。

佛系奇異博士

佢生存喺結界入面，得閒先走出嚟見下工。睇佢一身正正經經造型，表面上係一位專業嘅求職者，但拎走啲特效之後只係位佛系求職者。面試過程散發出一種Hea，佢相信，緣份到了，offer自然會有了。

紅衫女巫

你有冇見過有人著到成身紅當當，好似去飲咁見工？我有，我真係有。好明顯呢種係一種精神干擾，想令我以為自己食緊乳豬，其實我諗緊係咪撞鬼。