最近聽到身邊有HR朋友因為公司restructure而被layoff，大至Director，細至薯仔都聽過。成日都聽到人話HR唔重要可以消失，唔通真係大限將至要轉行做QC專家？
最近睇到篇文章，講IBM HR轉型，個顧問其中一句講得幾啱同大家分享下，佢話：
「一間公司嘅HR做緊咩，決定咗公司嘅競爭力。」
跟住舉例話如果HR只係負責出糧、請人、check下邊個遲到，咁只係做緊最傳統嘅工作。好多公司求才若渴，要HR參與喺策略上，公司先可以提高競爭力。
「其實HR唔係唔重要，重要嘅係HR做緊咩。」
事實上，今日HR唔可以冇危機感，上一代唔駛諗，做payroll可以做到退休，但今日我地呢一代唔可以唔諗。當HR提供唔到價值，前程可能似「咁」。
1.思維模式改變
記得以前喺一間公司做裁員，呀姐話賠足錢唔好犯法就得。但今日有公司裁員，會轉介同事去另一間公司見工。HR嘅思維模式開始變，由「點樣保障公司」變成「點樣做對公司最好」，佢地會考慮埋公司形象、同事感受去諗最好嘅處理方法。
2.學埋公司業務
傳統HR從來唔掂公司業務，所以永遠係一個backup嘅cost center。但新一代HR，例如HRBP呢啲角色會開始喺生意策略上參一腳，諗下點幫公司搵適合嘅人、從而搵更多嘅錢，由cost center變成profit center一部分。
3.袋住幾把刀
正所謂有人嘅地方就會複雜，除非AI統治人類，唔係一間公司唔會冇人。HR唔會被淘汰，只係角色變得更專業。只識處理HR行政工作唔夠，仲要變成周身刀嘅專家，例如法例專家、Career Advisor、Coach、Talent Management Expert等等。
如果大家最近有轉工或向上發展嘅念頭，不妨留意多啲上司喺公司嘅角色，到底係傳統聽指令嘅HR，定真係有機會參與喺策略上面。始終佢命運如何，你的將來也必如何。
好多公司嘅HR都變緊，只要肯提升自己嘅價值，相信一定會搵到發揮嘅地方。HR未來會變得更重要，千祈唔好睇小自己，大家加油！
WhatsApp查詢