HR的敏感機

 

有一日，當我成枱都係寫滿人工嘅文件之際，眼尾睄到有位女同事以奔跑嘅姿態沖向我個位度。我見佢跑得咁快，估計應該只餘下三秒鐘距離。

喺呢個moment，我心諗係時候駛出苦練已久嘅狂風轉兩頁神功，瀟灑地將所有文件反轉，點知一反，仆街⋯雙面嚟嘅！

 

就喺電光火石之間，我見到枱面右手邊有兩個box file，足以遮蓋整個枱面。我以迅雷不及掩耳嘅速度將兩個成斤重嘅box file拎出嚟「砰」一聲放喺枱面。

 

夾到手指！好L痛！

 

但呢個時候唔理得咁多喇，雖然好L痛，但女同事已經跑到身邊，我要從容地保持友善嘅形象：

 

「請問有咩幫到⋯」

 

點知呢位女同事⋯⋯竟然望都冇望我就跑咗去搵後面個同事呀呀呀呀！！

 

Yo! 我地呢啲見慣大場面嘅又駛乜驚，呢啲咁7嘅時候梗係扮冇事發生坐返低，㩒住隻好L痛嘅手指掀下個box-file扮睇下嘢啦⋯⋯當我以為神不知鬼不覺之際，耳邊突然傳嚟隔離嗰位毫無同情心嘅同事把聲⋯⋯

 

「我見到⋯曬。」

 

然後，佢開始恥笑我⋯⋯

 

聽講每個正常嘅HR都有一個病叫「敏感機」，學名叫「過度敏感保護機密資料症後群」。佢地會視所有接近枱面3米範圍嘅陌生生物為威脅，以求保護枱面啲機密資料。不過病情嚴重時，就會出現以上咁嘅病例。而且so9ry，冇得醫嘅。

 

#我唔信你冇囉
#笑！

圖片來源: 多啦A夢