HR主持Annual Dinner 4 要點

又快到年尾，今年Annual Dinner搵咗邊個做MC未? 我知大家作為HR，經常都會畀人擺上「台」做司儀，一句「你得嘅！」就畀人推咗上去。雖然你曾經反抗，但最後都係只能夠「X那媽，頂硬上」

作為頂硬上嘅過來人，我請教過啲專業司儀朋友，同大家分享下主持活動嘅幾個要點：

1.利用朋友

朋友呢個時候係應該攞嚟好好利用，因為Annual Dinner觀眾都係同事，台下有好多你識嘅人。攪氣氛需要互動，你可以target較熟嘅朋友，最好揀啲玩得，平時又識講笑嘅人同佢地互動。你可以問下佢地問題，叫佢地舉下手，運用佢地炒熱個氣氛先。

2.講嘢要正面

做MC講嘢要正面有分寸，如果你聽日仲想返工的話…千祈唔好攞「我都知老細今年未必加人工架喇～」、「Sales同Marketing坐得咁開，係咪唔啱呀？」呢啲咁嘅嘢嚟講笑。HR應該清楚大家嘅人物關係，炒高氣氛同PK可以只係一線之差。

3.做足準備

員工活動特別係Annual Dinner呢啲大場面一定要做足準備，了解成個流程、抽獎抽咩，度定講稿同攪gag位。子華神做棟篤笑都要度稿唔係爆肚，何況你唔係子華神? 而且你仲應該搵人同你做幾次rehearsals，確保一切順利。

4.把握做司儀機會

你可能會問，主持下活動駛鬼咁認真咩？又搞氣氛又練習又盛？份Payroll唔駛做啦~呢個位擺明係豬頭骨～ 雖然做MC係有啲挑戰性，但大家千祈唔好睇少呢個機會。老實講，份payroll做得幾準有幾多人知？但一次主持活動，你嘅表現隨時令全公司老細對你另眼相看。喺現實世界，我真係有位朋友因為幫公司做MC做得好而一戰成名，得到老細垂青平步青雲，皆因佢表現出過人嘅表達能力。

所以，下次有主持嘅機會我好鼓勵大家去爭嚟做，人人以為係豬頭骨嘅嘢其實可以係最好嘅機會。當然你都需要有好嘅技巧，如果你有興趣學多啲主持活動嘅技巧，嚟緊我地將會喺《Be a Presentable HR》workshop詳細講解。

#10月27日前早鳥優惠
#2人同行再額外9折