我自問為人都算低調，亦都唔係世界仔，但好多時都發現，公司裡面我唔識嘅人，都一眼認出我係HR嘅人⋯
有一次公司大型活動，差唔多夠鐘集合時，我人有三急去左個廁所，見到入面有幾位大叔，我認得佢地係同事，但係咩部門就唔知了。當我企喺度放鬆緊嘅時候，突然聽到佢地討論起嚟：
大叔1號：「一陣去邊集合？」
大叔2號：「唔記得喎！」
呢個時候企喺我身邊嘅大叔3號，向我上下打量一下，打破沈默咁話：
「跟住呢個人事部同事咪得囉。」
首先我唔知點解你識我啦，第二其實你認得我個樣咪得，又唔駛望埋下面嘅⋯⋯
又另一次經過樓梯口，有幾位同事喺後樓梯鬼鬼祟祟唔知做乜，其中一個人見到我嘅身影飄過就細細聲講：
「睇L住，HR呀！」
其實一啲都唔細聲，呢句嘢係好難細聲講嘅，你地試下講下就知
首先我冇打算睇你做乜，第二，我都唔識你，點解我飄一飄過你又認得我？
以上只係其中兩個例子，HR係咪註定要畀人點相？其實我個人好低調㗎⋯
WhatsApp查詢