HR必讀！企業註冊 eMPF 懶人包
我哋HR平時啲routine工作已經夠晒繁重，touchwood再爆一兩單ad-hoc嘢，真係十隻手都做唔切……
所以唔少HR同我一樣，都十分期待eMPF「積金易」平台投入運作。點解咁講？因為eMPF可以幫輕我哋每個月處理強積金供款嘅routine嘢，以後直接交畀佢自動計算供款金額，仲識得依時提你供款㖭。公司請到新人，又可以用eMPF批量上載新僱員資料，一次過幫佢哋登記強積金。如果你間公司provide緊多過一個強積金計劃，以後只需要經eMPF一個平台，就可以處理晒咁多間受託人嘅admin嘢，直頭係我哋HR救星！
強積金帳戶資料會陸續由而家強積金受託人嘅系統轉到「積金易」，係按照受託人管理嘅資產規模，「先細後大」順序逐個計劃做，而第一間強積金受託人喺6月26號就會加入平台。「積金易」啲功能多到數唔晒，身為HR係時間學定點幫公司註冊eMPF！跟住下面4個貼士做，其實又唔難嘅：
1. 未到你註冊？事先學定點用eMPF
第一個貼士，就係慢慢嚟唔駛急！強積金受託人會由6月底開始，逐個強積金計劃加入「積金易」平台。放心，未輪到你公司參加嘅計劃，就唔駛急住註冊，事關你嘅強積金計劃仲未加入「積金易」，所有行政同供款安排會維持不變，繼續由原有嘅強積金受託人處理，直至你嘅計劃加入平台之後，僱主就可以喺「積金易」處理呢啲工作。
我明喎，作為一位專業嘅HR，梗係早啲預備定啦，萬一畀老闆問到口啞啞點算？放心，「積金易」網站會update各個強積金計劃加入平台嘅時間表，上面仲有教學工具，畀你預先做定功課，仲有得預約埋eMPF嘅外展服務，到時一埋位就識得點樣註冊、點樣供款啦！
2.確保HR系統銜接eMPF
唔單只HR要準備，你公司嘅IT或者vendor都要on the same page㗎！特別係如果你公司有用開HR系統做強積金admin嘢，就係時候同佢哋瞭解定個system點樣銜接eMPF。
承辦商特別推出咗一份技術規格文件（technical specifications），幫各位老闆同你哋嘅IT vendor瞭解點樣更新你而家用緊嘅HR系統同software，咁之後就可以準備格式啱嘅檔案，同「積金易」平台對接就no problem啦！你可以透過呢個電子表格登記索取呢份規格文件㗎。早啲做定準備，到時就可以直接用盡eMPF嘅每一項新功能。
3. Mark實資訊包嘅「積金易」啟動碼
你公司參加嘅受託人會喺加入平台前嘅2-3個月，向你公司發放eMPF資訊包，到時候就可以跟指示註冊喇！
資訊包好重要㗎！收到記得要拆嚟睇，千祈唔好整唔見，仲要第一時間記住裏面嗰組「積金易」啟動碼！有咗啟動碼，註冊嗰陣就可以skip咗唔駛再填公司資料，簡單方便。註完冊，當強積金計劃正式加入平台，你公司嘅僱員、工資組別、自動轉帳安排等資料，就會自動波轉移晒去eMPF㗎啦！
4. 注意！加入eMPF後 支票供款寄畀邊個?
到你公司參加嘅強積金計劃正式加入平台，就記住要轉去eMPF處理強積金嘅admin嘢喇！最緊要梗係供款唔甩得啦，好在eMPF可以畀你透過電子方式供款，方便之餘，仲唔駛好似以前咁擔心張cheque幾時寄到。
如果老闆暫時仲係想開cheque咁點算好呢？咁就要記住eMPF支票繳付供款嘅新安排：支票收款人keep住一樣唔變，但係張cheque就要寄去積金易平台公司（尖沙咀郵政局郵政信箱98929號），或者親身交去「積金易」三間服務中心嘅投遞箱。記住，上咗平台之後，千祈、千祈、千祈唔好將cheque再寄畀受託人啊！
仲有嘢唔明？除咗可以打「積金易」hotline 183 2622，仲有其他聯絡方法可以查詢架！詳情可以參考「聯絡我們」網頁，咁樣無縫交接就零難度啦！
最後一句，將呢個post forward畀你啲行家同老友睇呀！
WhatsApp查詢