同HR拍拖的4個注意事項

 

最近同位朋友食飯，佢食食下豆腐火腩飯，突然嗱起塊面，狀甚痛苦，當我以為佢即將被豆腐骾死之際，原來佢諗起上次同做HR嘅女朋友食茶記嘅經歷，話要同我分享下。

為免佢骾死，我即管聽下佢訴苦

「嗰次同佢去茶記食飯，佢望住個餐牌十分鐘，以為佢諗緊食乜啦，點知佢竟然話：「張餐牌好多錯別字！」嗚哇⋯姐姐其實我都係想食飯啫⋯⋯」

聽完之後我除咗表示同情之外就只能夠表示深切嘅慰問，其實我好明白佢女朋友點解會攪成咁⋯⋯最後我同佢講咗句：

「同HR拍拖，帶點HR色彩，是相當合理的。」

 

1.請容忍他們的強逼症

 

HR其中一種職業病係完美主義強逼症候群。平時見到唔整齊、錯別字都睇唔順眼，唔搵出嚟會周身唔安樂。如果收到銀行啲信左右冇拍齊，會好想打去客戶服務熱線投訴。想佢地冇強逼症？只能夠叫佢退休養佢一世。

 

2.諗嘢諗得比較specific

 

佢約你去街可能會約得比較specific，例如「旺角港鐵站恆生銀行左手邊第二部櫃員機對出圍欄前嘅第二格階磚等」如果你去到唔係企喺指定嘅階磚，睇怕你嗰日都冇運行。唔好怪佢地諗嘢太specific，因為佢地平時做嘢真係要諗得好鬼specific，唔係是會死得好specific。

 

3.有時唔係好想講嘢

 

唔好以為HR係internal部門唔駛講好多嘢，做interview由朝講到晚，做training日日去演講，連坐喺位做payroll嘅都係咁接電話。因為返工已經講得太多，放工之後有時唔係好講嘢，你唔好怪佢。

 

4.塊面好似向西

 

佢地interview時經常畀人話西口西面冇笑容。一日見咁多人，有時真係會講到塊面都西埋。其實佢地冇惡意，可能係見得太多見工奇行種所致。放工佢未tune得返塊西北偏西面，唔好兜巴車返正佢塊面，畀少少愛心佢差差電。