今時今日睇CV，識睇一定係睇埋CV設計。隨住科技日新月異，拎住部電話都可以執相畫圖，幫份CV做個靚仔設計真係難唔到大家。以前會有啲設計嘅CV，通常都係做開Graphic、設計或者creative嘅人，不過而家，就算做個clerk、一個intern，都可能會用上設計大師嘅手法。
話說呢次我要幫薯格部請個clerk，喺一大堆CV入面經辛苦咗幾份applications出嚟約interview。
「哇，好靚呀！」
呢份CV用上咗特色嘅graphic，講真，設計嘅嘢邊度難到我吖，一睇就知佢用上咗設計大師貝多芬嘅理念、同埋莫札特嘅技巧，鮮豔嘅顏色令人有初戀嘅感覺。
欣賞完一輪份CV設計之後，當然要立即打畀呢位咁有heart嘅candidate，我一手拎起個電話，另一方面立即開始喺CV上搜索佢嘅電話號碼。
咦！電話號碼呢？冇嘅冇嘅？
電話號碼係個人資料，喺傳統嘅擺位上，都會擺喺CV最前嘅位置，名字嘅附近，方便人地一搵就搵到。不過用上設計大師嘅設計，佢地就未必會遵守呢啲規則，梗係啦，創意係講自由㗎嘛。
莫非又係一個大意唔記得寫電話嘅candidate？我拎起咗電話嘅手唯有放返低個電話先，但在我最灰心時候，抬望眼就找到了！
一路以嚟嘅習慣令我搵錯位置，呢位candidate 個名寫喺上面，但係個電話號碼就寫咗喺最底。大家可以想像下，就好似好多公司信紙咁樣，將地址、電話細細隻咁印喺紙嘅最下方，不過呢份喺一份CV。
最後總算約到佢見工，不過就花多咗啲時間咁。其實CV嚟講，實用性會比花巧重要。如果你真係讀design、做design，咁梗係要用返貝多芬嘅設計理念好啲啦。不過如果你只係搵份普通嘅文職，都係整整齊齊、傳統啲比較實際。
WhatsApp查詢