奇形怪狀CV系列之我興趣係幻想

唔知你地嘅CV入面會唔會有寫興趣呢一欄，有冇諗過點解要寫興趣? 寫咗對搵工有冇幫助？HR到底又睇唔睇呢？

首先，等我戴返個頭盔先。

好！戴好喇！我唔係咩人事顧問，冇人話過俾我知點解要寫興趣，我只能夠憑我貼地嘅經驗話你知，興趣呢欄並唔係我地篩選CV嘅重要因素，但如果CV有呢一欄，我都習慣會睇埋。一般情況下只係「你寫我咪睇下」，作用不大；不過如果寫嘅係同份工有關嘅興趣，就可能會比較有用。我舉返個例子：

例如你申請做金融才俊，興趣一欄可以寫：研究10天100天365天平均黃金交叉事業線圖表，志願喺追明星仔做老婆。當然，你唔好照寫我呢個特別效果版，自己修正返。

但係如果你申請嘅係一般文職，你寫興趣係踢波、游水、睇書、行沙灘等等呢啲都無傷大雅，都係「你寫我咪睇下」。但我最近就見過幾個比較特別嘅興趣…

1. 炒期指
呀大佬，我請你返嚟，你就日日炒期指，秒秒鐘幾百萬上落咁，份文件打一隻字嘅時間分分鐘值幾皮嘢，仲高過我份糧喎，點敢請你呀大師？

2. 打war game
係…雖然office日日都好似打仗咁，但唔駛揸槍㗎喎！你會唔會著埋軍服返工㗎？如果你申請做宋仲基都可能有用嘅…

3. 食嘢
請你返嚟之後成個位都係零食，日日掛住食唔駛做啦。而且你食唔緊要，唔好影響埋公司啲女神呀。

4. Shopping
嗱嗱嗱！Shopping做興趣好危險！簽到成身卡數，唔好真係以為「妝都唔駛落」就攪得掂。我唔想公司俾人淋紅油呀！

5. 幻想
點解興趣可以係幻想，以幻想作為興趣嘅人到底分唔分得開現實與幻想？而且你呢種興趣喺返工嘅任何一刻都可以進行，點樣分得出你做緊嘢定係幻想緊？我參唔透呀師父…

所以興趣呢一欄都唔可以亂咁寫，要寫就寫啲同工作本身有啲關係嘅，唔寫其實亦都無傷大雅。