我叫統計明，係一個統計署職員，當年我嘅人生最大目標就係搵到一份政府工。畢業出嚟搵左幾個月工，見完工等足幾個月，終於收到統計署打嚟話請我。嗰下我真係興奮到彈起，因為眼看我嘅人生夢想就要達成了，我仲特登約埋班friend，請佢地去任食老麥慶祝。
終於等到第一日返工，心情既興奮又緊張，心諗我終於可以過到夢想中嘅生活，每日輕輕鬆鬆鄧梓峰，Hea到五點就收工，真係諗下都爽皮。第一日返工，我老細 同我講我負責嘅工作會十分艱鉅，當時嘅我少不更事，滿腔5點準時收工嘅熱誠，仲未知自己要面對嘅原來係全香港嘅邪惡HR…
由嗰日開始，追HR收問卷已經成為我最主要嘅任務，每一季嘅僱傭及職位空缺統計調查都係我嘅惡夢，再加上林林種種各行各業嘅調查，份調查未完成，我就已經俾你地班HR啪啪啪調教咗十九萬次。
「你地要咁多資料做咩」……啪！
「你份問卷咁設計，我答唔到」……啪！
「我冇資料俾你喎」……啪！
「得鬼閒答你」……啪！
「公司野都冇時間做，點幫你呀」……啪！
「答呢啲？」……啪！
「俾錢就幫你做！」……啪！
個個都係咁cut我線，其實我都諗咗好多方法幫你地，諗住叫你淨係講個數俾我知就得，但點知又俾人鬧：「唔係填嘅問題！就係我冇時間搵個數俾你！」……啪！
講到我好似低能咁…
仲有！有時你地俾我啲數都唔知啱唔啱，同上季個數有大出入，仲要幫你地諗埋藉口，其實我都諗得好辛苦㗎！
你地明唔明啫？我都係打份工，追唔到份問卷，我唔單止冇得5點收工，仲俾人妻女上司調教一晚冇陰公。今日我做咗個人生最重要嘅決定，我唔撈喇！唔同你地癲喇！雖然明知我們隔著個太空，但我都希望得到你地親筆的答覆。點解你地要咁對我？點解你地咁唔鍾意交問卷？
被HR啪啪啪咗十九萬次嘅統計明上
*以上內容純屬幻想，如有雷同，純屬巧合。
WhatsApp查詢