案例對於做HR嘅大家嚟講係十分有用嘅reference，當遇到有類似嘅問題喺公司出現，可以幫到地球人唔好犯同樣嘅錯，開會仲起碼吹得兩嘴，所以我好建議大家袋返幾個旁身。為免大家例到用時方恨少，我決定定時定候同大家開心share下一啲同HR有關嘅案例。
呢單案件發生喺2014年，故事主角L小姐受聘於教育局嘅外判公司，佢份一年合約即將到期，喺合約完結前就收到公司嘅續約通知。
喺一個月黑風高嘅早上，L小姐返到公司，老細C小姐已經準備好合約畀佢簽。不過，當簽完約之後，L小姐講咗件喜事畀老細C聽，佢話自己大咗肚，嚟緊要向公司申請放產假咁話喎。點知老細C聽到之後心感不妙，因為L小姐已經受僱滿40星期，續咗約之後就可以享有有薪產假。喺簽左約一日之後，佢就同L小姐講：
「因為你遲通知我要放產假，所以尋日份合約要取消。」
話取消就取消咁兒戲？L小姐覺得佢咁做係歧視佢大肚，決定向平機會投訴。老細C知道自己被投訴之後，竟然諗咗條絕世好橋。
隔咗幾日老細C搵返L小姐，話可以提供份新合約，但個合約開始日期竟然同之份約隔左一日！係隔左一日呀！即係話佢將L小姐合約中斷咗，意圖令佢變成唔係連續性受僱，因而唔可以享有有薪產假。
勇敢嘅L小姐冇就咁算數，佢透過平機會控告老細C歧視佢懷孕。喺庭上面法官大人就話，老細C取消合約係因為知道L小姐懷孕，意圖中斷合約，逃避畀有薪產假嘅責任。最後根據《性別歧視條例》，判老細C要賠償9萬元嘅產假薪酬、感情損失及懲罰性賠償。
雖然勞工法例話按接連續性合約受僱滿40星期先有有薪產假，但唔係故意斷開份合約就可以逃避責任。喺呢個case入面可以睇到，除左《僱傭條例》嘅連續性合約，仲有《性別歧視條例》保障孕婦。補返產假薪酬都仲有數得計，但感情損失、懲罰性賠償就好㩒計，所以面對涉及歧視嘅case，大家就更加要特別留意。
參考案件編號：DCEO11/12
WhatsApp查詢