HR的男生其實很吸引

人人話楝男友最好揀個做醫生、律師，或者揀個做基金經理，有錢有樓養番狗。OK，如果你覺得佢地可能好遙遠，我都有聽過有人話揀個做會計、做IT、做Marketing、做Sales，但就從來冇聽過有人話要揀個做HR嘅男人。點解？點解？有冇諗過其實我地做HR嘅男生係好吸引㗎？等我幫大家分析下:

 

1. 細心過女人

 

係HR世界生存就必須要細心，自神創造呀當夏娃已經設定咗女仔比較細心，細心嘅女仔做HR自然比較得心應手。HR每日出街嘅文件大細階唔可以錯、計糧一蚊都不能多也不能少、你試下打錯人地個名即刻俾人插到飛起。所以如果男仔可以喺HR界生存證明佢一定好細心，甚至可能細心過女人。如果同咁嘅男仔一齊，你一定唔駛問佢今日你有咩唔同，因為你唔問佢都知道你今日係剪咗腳甲。

 

2. 超強EQ值

 

如果你有睇開HR小薯蓉呢條友個page就知道HR會經常遇到見工奇行種，或者成日出現嚇死HR嘅事件。所以要維持正常人狀態，就必須要有好高嘅EQ值先頂得住。包保你唔小心破壞咗佢嘅機動戰士都唔會發你脾氣。

 

3. 好腰好腎好男人

 

HR通常都係一個充滿女性嘅辦公室，體力勞動嘅工作自然落係男生身上。「冇水喇！」十對眼射住你!「啲file好重呀！」十對眼射住你!「拎啲糧單去派」十對眼射住你! 如果你唔做呢啲體力勞動工作？十對眼射住你!「做男人做到咁小家㗎」「次次佢都唔換水㗎！」「明知成office都係女仔㗎啦！」日日舉重，你話點會唔係好腰好腎好男人？

 

4. 超強記憶力

 

每位同事入職都一定要經過HR，所以個個都會認得我哋。但問題係有咁多新同事，我地做HR又要記得晒啲名、又要認得晒啲樣真係難過記住當年亞視啲明星。有人走埋嚟同你吹水，你唔記得人哋係乜水，到時真係O晒嘴。所以HR都裝備咗超強記憶力腦袋，你爸爸媽媽朋友或愛人、耶穌佛祖生日佢都記得，1281日紀念一定走唔甩。

 

5. 絕不花心

 

每日喺HR呢個充滿陰氣嘅環境工作，正所謂「三個女人一個墟，痴得太近腎都虛」佢一定明白太多女生喺身邊未必係一件好事。返到屋企佢絕對會享受被一班男人包圍嘅感覺，佢班兄弟包括ironman、美國隊長、超人、蝙蝠俠、蜘蛛俠個個都係猛男，有你一個女人點綴下已經會覺得好足夠，所以絕對唔駛擔心佢出去搵女人。

 

所以如果你有個做HR嘅男朋友請你好好珍惜，如果你身邊有做HR嘅男生又不妨考慮下佢。

「識貨嘅梗係要揀個做HR嘅男人」