坐得HR主管呢個位，通常都已經身經百戰，EQ有返咁上下，甚麼邪魔妖怪、花草樹木都激唔嬲佢。不過有啲部門主管完全知道點樣可以辣㷫HR，呢啲禁語仲靈過哈利波波啲咒語。
Level 1
「冇人工加？去問HR啦。」
望一望講呢句說話嘅部門主管先，佢個膊頭如冇意外都係呈A字狀，嚴重者甚至係呈H字狀。大佬呀，你唔想加畀人就唔好瀉畀HR先得。唔好以為我地唔知，傳下傳下全公司都知，你做好人啦，我做衰人好啦。
Level 2
「你唔批多個headcount，攪到我啲人走曬。」
呀大佬，咩叫做我攪到你啲人走曬先？我去你部門叫啲人走咩？公司唔可能開無限headcount，叫你檢討下人手安排又唔做，冇嘢畀老細睇，點批畀你呢？仲有呀，啲人exit interview話辛苦唔係走嘅理由，聽講你先係喎。
Level 3
唔係呀嘛？仲未夠㷫？試埋呢句，老細唔㷫你都要㷫！
「請唔到人呀？叫你啲人落嚟幫我做囉！」
我今次真係叫曬你大佬喇！你當你係老細呀？我啲人幫埋你做嘢，咁全公司都唔駛請人啦！而家全公司得你一個部門呀？下？下？
如果你HR老細聽到level 3都唔識㷫，我係你都唔知點算好，你都係諗方法救下自己啦。不過，以上叫曬大佬嘅內容，大家都係喺度FF下算喇，面對呢啲大大聲嘅Line Manager，沉著應戰先係皇道。
好，幫大家發洩完，大家都係返出去請人啦。
Image source: Business vector created by Freepik
WhatsApp查詢