迷之2nd in. 乜又係你呀？

First in., second in., third in., forth in.⋯⋯聽過有啲職位好鬼誇張，要做N次interview先可以決定到人選，老老豆豆，真係好鬼勞民傷財。

見工要做兩輪面試係好平常嘅事，通常要2nd in.係因為需要見另一個比1st in.高級嘅人，不過今次呢個case有啲特別。

故事主角叫小櫻，有一日佢去蕃茄公司見一個薯仔職位。呢日係1st In.，佢做完個test就坐喺梳化等咗半粒鐘，終於畀人召咗入房。

房入面坐咗位中國藉中年女子，佢介紹自己係呢到嘅高級經理叫火影。小櫻心諗：「第一次就見高級經理？中間嗰啲supervisor呢？」不過隔咗一秒佢又諗：「可能一見見最高級嗰個，之後唔駛見咁多次。」

喺房入面傾咗兩個鐘，火影經理就例牌咁同佢講：「有咩消息我地會再通知你。」

過咗幾日，小櫻就收到通知要2nd in.。因為預計要見更高級嘅高層，所以佢更加緊張。今次好快就畀人召入房，同一條路線，最後抵達同一間房間，但當見到房入面個人，小櫻就覺得好奇怪⋯⋯

乜又係你呀？？

坐喺房入面嘅火影經理同小櫻講：

「歡迎你嚟做第二次面試。」

小櫻左望右望，一眼睇曬成間房得火影經理一個。小櫻心裡面充滿咗疑惑，呢個莫非係影分身？莫非我認錯人？佢係林鄭定陳甘美華？定係佢有雙重人格？係Barry定Dennis？1st in, 2nd in都係見同一個人，到底係咩玩法？點解要分兩次見？點解要人特登走兩轉嚟見同一個人？

結果小櫻2nd in.同火影經理傾嘅嘢都係大同小異，見完之後小櫻依然唔明點解要見多次，成件事好似為咗要有2nd in而2nd in咁。

今時今日，請人都係分秒必爭，正所謂蘇州過後冇艇搭，冇人上船畀人插。喺許可嘅情況下，我都會盡量安排同一日攪掂，等大家唔駛走兩轉之餘又可以提升招聘效率。至於火影經理點解要人地走兩轉見自己兩次，呢個真係一個迷迷迷⋯⋯