12種HR最怕見到嘅求職者 (下)

7. 靜過鬼…十問九唔應，踢一腳郁一郁

有d人比較靜，問一句真係答你一句，你估係SIRI咩?SIRI都識同我攪下爛GAG啦。咁樣會俾人不擅表達嘅印象。例如問你之前做過咩，唔係答完個職位就算，講多少少做過d咩，得到咩經驗。亦有d candidate永遠都唔會同你有眼神交流，佢地永遠會望向你…後面個牆。精神啲! 臨記都係演員! 比啲眼神嚟先得㗎!

8. 勁懶蟲…見工懶得做功課，公司做乜都唔知

見工前最好上網搵下間公司同申請職位嘅資料。試過問candidate你覺得份工主要做啲咩？佢諗左陣之後講「照字面睇呢～依份應該係文職工作」唔該晒! 討論區都經常有人講唔同機構嘅職位，係攞料嘅好地方。唔係開始見就俾人問到口啞啞，見5分鐘已經可以bye bye喇。

9. 黑臉神…問幾句就黑臉唔想答，到底係咪想見工

有時啲interviewer會刻意擺起個款，或者寸下candidate。目的係要試下面試者嘅EQ值有幾高，受唔受得壓力。唔好被寸兩句就黑臉唔想答，反而要更加鎮定。

10. 奴隸獸…「你肯請我做咩都得」咁攪我真係好驚喎

「我真係好鍾意你地間公司! 任何一個職位我都肯做㗎!」公司其實係想請一個適合嘅人做適合嘅工作。唔係你咩都肯做就可以見得成份工，除非你見果份工真係打雜啦。咁講一啲分數都拎唔到，反而令人覺得你唔係有心想做呢份工。

11. 篇幅俠…背誦如流，講極唔斷氣

呢類candidate準備十足，將預測嘅試題寫晒落貓紙，篇幅長過畢業份paper。見工時再由頭到尾背返出嚟。試過叫個candidate自我介紹，「你好! 我今年2x歲，係牛頭角度住，細個係牛頭角官立小學讀書，我好文靜，最鍾意玩摔角…」停停停! 本來準備係好事，但幾篇文咁唸出嚟就over左喇！一遇上貼唔中嘅問題就口啞啞。所以適當嘅準備就夠喇，背出嚟就好死板。

12.計較王…人工車錢飯錢樣樣算盡，唔方做得長

「我想問車費點claim㗎?max幾多?有冇員工購物優惠?…」人工福利對打工仔嚟講係好重要，但問你有咩問題就淨係關心有咩福利津貼，俾人好市儈嘅感覺。大家傾得埋嘅，人工福利可以慢慢傾，人地未話請你，唔駛咁心急嘅。

其實見工有禮貌，用平常心，老老實實，已經係成功嘅一半喇!