12種HR最怕見到嘅求職者（上）

《12種HR最怕見到嘅求職者》（上）

做左呢行一段時間，嚟見工嘅真係咩人都有。你地以為得個candidate驚面試? 作為interviewer嘅我遇到以下各類人重驚呀！薯蓉我係度分享少少意見，大家交流交流，或者可以幫到最怕見工嘅朋友。

1. 吹水怪…吹水唔抹嘴，一問就知你龍與鳳

「公司成個部門都係睇我頭! 公司有一半SALE都係我搵返嚟，好多公司想搵我過檔，不過係大老闆留我先繼續做!」試過有求職者不斷吹噓自己過往經驗，自己有幾叻，公司幾重視我，講到自己走左公司差唔多要清盤咁。嘩嘩嘩! 我地請左你咪罪大惡極？點到即止，過份表現反而會惹人反感呀！

2. 試下仙…申請原因係想試下，咁你下次再試下申請啦

「我想試下依份工啱唔啱自己」。次次聽到「試下」呢兩個字，我都打個冷震，因為會感覺到你都冇信心勝任份工，我又點夠膽比你「試下」份工? 如果覺得自己有不足嘅地方，不妨講下自己會點改善。另外，盡量表現出自己對呢份工嘅興趣，唔係試下唔啱就算。

3. 烚熟臉…笑騎騎放毒蛇，呢個人相當可疑

唔知係咪我太靚仔😛，試過有candidate俾讚美既說話我聽。但我就對呢d甜言密語唔太受落，反而覺得佢另有目的，相當可疑，印象分即時大減。見工啫，唔係個個都受呢一套，呢d說話未必幫到手，可免則免啦。

4. 眼淺人…講講下講到喊，傾傾下出去拎紙巾好尷尬

有次見個fresh grad，話自己好感激呢次面試機會，唔知係咪緊張得滯，講講下突然哽咽起嚟，攪到我要出去攞紙巾，同事以為我攪喊人…最後都冇請佢，因為老細覺得佢handle唔到壓力。

5. 挑機者…考返面試官轉頭，而家邊個主場先？

唔知係年少無知定年少氣盛，試過有candidate挑戰同我一齊interview嘅老行尊，結果俾人兩句就KO咗。雖然係膽色過人，但唔係個個面試官都咁大方接受到俾人挑機㗎。

6. 大話精…上一份工嘅人工填高啲，鬼知咩？
通常公司嘅申請表都會需要填之前工作嘅底薪。但有啲人會特登填高啲，或者取巧地將bonus、車錢、飯錢都填埋落去，以為神不知鬼不覺，可以瞞天過海。但實情好多公司都會做reference check，一check就睇穿你人格啦！求職者唔好亂試！

 

睇埋下集:

12種HR最怕見到嘅求職者 (下)