《10種HR同事 梗有幾種喺左近》

 

1. 急口令神童

 

此類同事因為簽約次數太多太頻密或者太多interview要做，連講嘢嘅時間都要大大壓縮。聽佢講嘢幾乎要拎個電話出嚟錄音，replay幾次先聽到佢講乜。

 

特徵：說話速度快到可以由你左耳直穿右耳

 

2. 唯一男丁

 

HR少男丁出晒名，佢地主要嘅職責係搬文件、換水同埋搬文件、換水。喺女性當道嘅HR，地位一般處於食物鏈嘅最底層，有冤無路訴。

 

特徵：經常（淨係）於換水時被稱讚靚仔

 

3. Photo-hunt高手

 

HR文件唔錯得係理所當然，每個人事部總有一兩個高手，所有錯字錯格式都逃唔過佢對鷹眼，去機舖玩photohunt一定玩到天光都未輸。

 

特徵：發現3連錯combo會陰笑

 

4. 法律狂人

 

熟讀勞工法例，唔駛睇都背得出法律條文。問佢一條問題會講幾個案例故仔畀你聽，屬於人力資源部的法律諮詢顧問。

 

特徵：唔制止佢會講唔停口

 

5. Excel之神

 

喺需要處理大量data嘅HR，部門裡總有個Excel之神。當你睇到佢用緊個Excel就知自己平時有幾無知。喺錯縱複雜嘅formula當中你睇到神嘅偉大，慨嘆原來excel係咁神奇。神呀！教教我吧！

 

特徵：經常有人排隊問Excel

 

 

6. 偽黑面神

 

平時唔講嘢個樣超正經，每次做interview都會擺起個款，嚴肅嘅樣子經常嚇親candidate，以為佢好鬼惡死。但一同佢傾閒計，你會發現佢係真·kai嘅。

 

特徵： 睇得下（唔出聲嘅話）

 

7. 傳說中的同事

 

呢位同事好似只係活係傳說當中，除咗朝早返工或者放工時間見到佢之外，個位大部分時間都冇人坐。傳說中佢地可能係做recruitment成日去見人，又或者係做training永遠都去咗上堂，又或者根本冇人知佢去咗邊…

 

特徵：披住隱形斗蓬嗰個

 

8. 三寸不爛之舌

 

為員工爭取福利喺HR嘅天職，總有條三寸不爛之舌向各大商戶搲折扣、謀福利。但千祈唔好同佢過唔去，同佢嘈交你實冇運行，認輸啦。

 

特徵：超難應付

 

9. 自言自語怪

 

HR同事每日工作好多時都要不停同唔同嘅人講嘢，呢種同事唔知係咪冇人同佢講嘢會周身唔聚財，又或只係太大壓力做到short咗，成日都會坐喺個位度自己同自己講嘢。你以為佢同人講緊嘢，但望過去鬼影都冇隻，又唔係講緊電話，原來係自己同自己傾緊計。

 

特徵：左手識同右手傾計

 

10. 風中戰士

 

佢係活在風之谷的人，收風就係佢嘅嗜好，無論任何部門發生咩事，任何風聲都盡在佢掌握之中。當你發現有唔尋常嘅事情，前往風之谷總會搵到答案。對佢嚟講，風能收亦能放，已做到收放自如的境界。

 

特徵：擁有最新公司人物關係圖的人