遞信請留意返

睇咗辭職信咁多年，發現好多人無論辭幾多次職，都係唔會識寫辭職信，如果你打算辭職，可以留意下以下幾點…

1. 邊日係last day？

近排成日都收到電話打嚟問，「我想辭職，但唔知邊日係last day。」其實係好簡單嘅數學題，例如你2月5號辭職，要一個月通知，將5減1再加返1個月，即係3月4號就係last day喇！不過如果係月尾嗰日辭職就要特別留意，last day會喺下個月尾最後一日，例如2月28號遞信，3月31號先係last day。你可能都覺得好簡單，但原來好多人都會亂寫，難為HR嘅哥哥姐姐成日要打去同人confirm。

2. 記得寫埋邊日辭職

有啲人搵蘇師父算過邊日last day係吉日，但又唔知應該邊日辭職先啱。其實跟返上面嘅計算方法就計到，但請記得寫埋你嘅辭職日期係信上面，唔係HR計唔到你有冇俾足通知期㗎。

3. 請簽名吖老細

辭咗職你就重獲自由，自己做返自己老細。不過麻煩你係炒你老細之前睇睇封信簽咗名未，唔係我以為封信係你隔離位幫你寫，「被辭職」都唔知。

4. 唔該霸氣少少

最近短時間內處理大量辭職信，嗰幾封一模一樣嘅辭職信真係好鬼覺眼，佢地只係人名日期唔同，內文每隻字都一樣，唔睇真啲真係差啲當副本碎鬼咗。我諗應該係google大臣頭幾個建議嘅sample啦……其實辭職都可以型少少嘅，有一封自己寫嘅辭職信，辭都辭得有霸氣啲啦！係先唔係先？

祝辭職順利，搵份好工。今次講完辭職信，下星期講下求職信要留意啲咩。