嚇死HR系列之黑帝炒人

「呼..呼….呼」

呢個人原力好強！

電話裡面傳嚟黑帝般嘅呼氣聲，我個心即刻離一離，心裡即刻默念：「May the force be with me….」

原力仲未覺醒之際電話就傳嚟黑帝嘅叫聲，係「叫叫叫叫...（回音）」聲呀！

「好㷫呀！我要炒左佢呀！！即刻幫我做野！」

呢位係薯仔切割部嘅supervisor，係佢手下工作過嘅薯仔大部分都被切成碎片，不似薯形。好彩我呢粒薯仔唔係under佢，唔係已經灰飛煙滅，邊有咁得閒係度寫文。今日佢似乎又想開動佢部薯仔切割機，巧驚驚…

「哦…係呀？請問係邊個staff（咁唔好彩）呀?」
勞氣嘅黑帝話：「咪上個月你請嗰個靚仔囉！」

講到好似我請咁，黑帝你嗰時有份interview，仲話趕住冇人用，要人地即刻返工..





「哦！請問發生咩事呀？」
「我啲同事同我講，個仔係公司瞓覺呀，仲話佢有野唔做呀！」

由於我知道黑帝份人做事衝動，而且講到要炒人咁嚴重，作為專業嘅HR係梗係要了解件事嘅詳情啦！

「呀…咁請問你有冇同佢傾過呀？係咪佢自己都認左有瞓覺？」
「冇喎！仲有咩好傾呀？總之返工係做野，瞓覺就唔得！我信我啲同事唔會生安白造！」
「佢可能係唔舒服喎，會唔會了解下先好啲呀？」
「冇喎！佢依家瞓覺呀！咁我係咪唔炒得佢丫？」

通常啲奸角都係比較易燥底…

「嗱！因為佢已經做多過一個月，炒佢要7日通知喎。」
「仲要我等7日？？」
「如果要即炒一蚊都唔賠，你之前又冇同人傾過，又唔係令公司有嚴重損失，公司唔可以咁炒人㗎喎！」
「……..咁麻煩…」
「不如你了解下先啦，同個同事傾下，睇下解唔解決到個問題先」

黑帝冷靜落嚟之後都決定去搵個同事傾計。最後佢同個同事傾完，個同事承認自己有問題，話會會改善。結果黑帝冇再話要炒佢，依家仲做得好地地，probation都過埋。

好多人都以為HR一定係禮義廉啲friend、黑武士隔離隻白兵，同啲老細同流合污、助紂為虐，成日企係老細嗰邊。其實炒一個人理據要好充分，被炒嘅如果睇唔開走上勞工署，麻煩嘅都係我地，而且仲會影響公司聲譽。我地都會建議老闆多觀察、溝通，睇下解唔解決到問題，唔係郁下話炒，請幾多個返嚟都唔夠洗呀大佬！白兵唔一定係奸㗎！HR fellows, may the force be with you！