HR難免會有好多重覆性嘅文書工作，啲人出出入入，呢頭做完orientation，嗰頭又要做final payment，來回地獄又折返人間，工作永遠不停地循環。重覆性工作好易令人失去動力，要喺工作上面得到滿足感，先可以成為我地做嘢嘅新動力。你喺HR嘅工作有冇滿足感，問下自己以下呢5條問題：
1. 你有冇樽鹽？
明明個candidate態度惡劣，工作經驗不符，人工要求超出正常水平，但部門主管又死都要請。呢個時候你有冇say? 有冇試過成功爭取唔請呢啲奇行種，有冇辦法幫我地捍衛到HR嗰樽鹽？
2. 你係咪淨係做問卷？
HR大大小小嘅project或者ad-hoc工作，你老細有冇俾你做？突如其來嘅recruitment campaign、policy嘅修訂， 有冇你份參與討論？定係將你投閒置散，淨係負責做統計明嗰份統計署問卷？
3. 你係咪一隻棋？
做嘢冇自主權，每每唯命是從，咁同條咸魚有咩分別？留意下自己有冇機會作主，定係覺得做到Senior都只會係一隻棋？會唔會細至開個box file呢啲雞毛蒜皮嘢，皇上都要你請示咗佢先？
4. 你存在嗎？
HR係一個經常要同公司內部其他部門溝通嘅部門，身為HR嘅一員，喺公司就算點都應該要有返少少名氣。就算叫唔出你個名，都應該知道你係HR嘅人。但係做唔到梁朝偉都唔好做梁烈唯，保持正面形象好重要。如果做咗幾個月甚至一年都冇人知道你存在，係時候諗下自己嘅存在價值。
5. 你公司重視人力資源嗎？
公司重唔重視人力資源直接影響HR工作嘅滿足感。如果公司管理層願意投放足夠資源喺人事政策上面，HR可以做嘅嘢、我地學到嘅嘢就更多。留意下公司肯唔肯擺資源喺員工度，定係慳慳埋埋啲錢攞晒去JobsBB登廣告請人。
WhatsApp查詢